【每逢大事講故事】意大利公投 看今年第三隻黑天鵝如何展開翅膀

撰文:飛雲
出版:更新:

成日有人話意大利公投係今年第三隻黑天鵝,對於全球經濟嘅影響,隨時大鑊過英國脫歐,大鑊過特朗普做美國總統。你問飛雲點解?因為嗰五隻歐豬,依然全部都係豬!經濟搞唔掂,今次公投一旦過唔到,總理倫齊分分鐘要執包袱走人,隨時引發意大利版脫歐公投,你話大唔大鑊喇?

2010年歐債危機爆發,總理貝魯斯科尼(下稱貝老)捲入嫖雛妓、貪污多單訴訟辭職(乘機拍下籮柚走左囉),呢幾年政府換個不停,踢走個行緊縮政策嘅蒙蒂,換一個要大刀闊斧嘅後生仔倫齊上台,依家推動修憲公投,貝老居然呢個moment又殺出黎從中作梗。

講意大利文,飛雲淨係識得Bunga-bunga呢個字,多得平時有睇新聞,貝老教嘅,urban dictionary都有架:

Bunga-Bunga 

Erotic ritual which involves a powerful leader and several naked women.  

After dinner we all had some bunga-bunga

講貝老有啲咩政績,在任總理合共9年,飛雲真係咩都唔記得佢做過乜,淨係記得……

舊事唔講住,不過今次貝老出黎拉齊倫後腿,正正說明咗咩叫君子報仇十年未晚。話說貝老今年六月心臟有事,需要開胸做手術,醫生都話佢死過翻生。你以為佢已經被打了敗嗎?你實在太睇少呢個80歲阿伯,雖然佢依家個朵臭到無可能重上意大利政壇頂峰,但其實由佢領導嘅意大利力量黨(Forza Italia)仍然把持國會大量議席,握有12%意大利民眾嘅支持,要左右大局亦有可能。

倫齊今次發動公投修憲,大家都形容為一場政治豪賭,押上嘅賭注就係自己嘅政治前途。順帶一提,佢只係41歲,做得貝老個孫囉。貝老爺大病初癒,本來好應該休養一下,點知公投前夕就走出黎反對修憲,同倫齊唱反調。

貝老話今次公投削減國會權力,會令國家走向「獨裁」,仲話倫齊係大話精,「我覺得佢係共和國史上第一嘅大話精,仲叻過我。佢得嗰40歲,係我歲數一半,佢仲有大把精力活力,四周圍散播大話。」

死過翻生再插你一刀,呢個就係貝老!家陣民調顯示,倫齊推動嘅公投,獲通過機會危危乎,些微落後於反對陣營,貝老再走出嚟煽動下,隨時搞到一大班溫和派中間偏右嘅選民投反對,倫齊就真係係咁大。

貝老鬧倫齊削減國會權力,係無錯嘅,不過飛雲就話:

話說2014年倫齊啱啱上台,貝老同意大利力量黨其實都幾撐佢,支持修憲縮減參議院規模及力量,不過2015年倫齊竟然將自己友推上總統呢個職位,拒絕推舉原本兩黨都有共識嘅候選人。咁即係咩?即係起人飛腳,如果唔係喺政圈,真係要出江湖追~殺~令﹗

(電影《江湖告急》截圖)

當然,貝魯斯科尼嘅力量黨就因此拒絕再同倫齊政府合作,亦不願再推動政制及憲法公投。

雖然鬧翻咗,不過其實唔少意大利政壇中人,都覺得倫齊係young版貝老,有貝老嘅前幕僚仲形容:「倫齊kind of似係貝老嘅仔。」唔單只身型,髮型...吖唔係,係大幅減稅,修改勞工法例等僱主更容易炒人,希望修憲加大總理權力,又讚普京啦。兩個人嘅共通點,其實仲有一樣──就係獨裁本質,兩位政治人物對於反對聲音,都強橫趕絕,郁啲就叫人收聲,有佢講無人講。

至於兩個人嘅分別,除咗年紀同頭髮,就係貝老想做但又做唔到嘅野,倫齊卻實踐到……

不過堂堂貝老喎,咁樣俾個o靚仔跣左一鑊,唔嬲豬就假。所以今次公投過唔到,貝老實開心,因為佢又有機會重組新政府,撈番多啲政治本錢。

其實點解成日要將公投同辭職綑綁埋一齊呢?都係因為啲領導人太過任性同硬頸。

倫齊除咗有舖賭仔癮,查實佢喺意大利政壇,不嬲出左名係衝動派,大家都知佢有個朵叫「拆卸王」,有咩舊政策,舊制度有唔啱,索性推倒重來。所以如果今次公投不獲通過,佢已經重申咗N咁多次話要即刻辭職,唔肯聽奧巴馬講繼續留任過度政府總理,直至舉行大選。

佢仲串串貢咁話「我無需要喺CV加多行」,公投輸咗對佢no problem,只係意大利人將來少咗個選擇。極右北方聯盟(Northern League)同力量黨已經表明公投唔通過,就會要倫齊落台,不過其他黨派取態比較務實,怕政治動盪令經濟更加危危乎。

經濟學者兼前總理蒙蒂雖然反對修憲,但覺得即使公投輸咗,倫齊都無需要辭職,希望佢可以繼續留任。事實上從來亦冇規定齊倫輸咗公投就要辭職,咦,呢個畫面真係令飛雲覺得熟口熟面......

但倫齊似乎仲係好硬頸,繼續威脅話:「技術政府顯然存在風險,但我不能避免,意大利人要投贊成票才能。」

倫齊呀,我夠知你輸左唔駛死,但飛雲我已經責住成堆英鎊蟹貨喇,意大利公投如果過唔到,五星運動就有機會喺下年又再發動脫歐公投。唔係Brexit呀,係Itaxit呀,如果係真就影響成個歐盟,到時真係eat a shxt,影響嘅唔係意大利人自己囉。你賭咁大,有無理過我地感受呀?

無錯,學黎明話齋,路係自己揀嘅!意大利人,你識DO啦?! 

關於意大利公投的3條問題

  意大利公投為了甚麼?

改革內容是將參議院議員人數將從315人被削減至100人,議員亦不是直選入局,而是由政府從地區議會挑選。另外參議員不再具有審核政府預算和通過不信任案推翻政府的權力,不過就會有監督地方事務的權力;眾議院則會實行兩輪投票機制。去年有關建議獲國會支持,630個議員中有360個贊成,但根據意大利法例,只有得到三份之二的支持才可以自動通過憲法,否則便需要公投;反對勢力批評有關憲法改革不民主。

  意大利公投為何值得關注?

意大利政局一向不穩定,自1945年以來有63屆政府,因此各黨派多年來都要求改革政制。但現時提出的改革已討論多時,左右翼政黨聯合反對倫齊,就算他所屬民主黨內亦有反對聲音,外界普遍認為,改革若遭否決,倫齊下台,將引發國會重選,造成政局不穩定;如五星運動等反對勢力上台,更可能脫歐。

  意大利公投還有甚麼變數?

如前所述,未決定的選民可能會左右公投結果,投票率低也是另一個變數,過往不投票的人會否出來投票,也有很大影響。