【豬年2019】回顧上一個豬年的他們　今個豬年他/她的生命轉軌跡

民主黨黃碧雲

十二年前，黃碧雲仍未正式參政，在理工大學擔任講師和從事研究工作。她以休悠和安靜形容當時生活，不過自從2012年循地區直選晉身立法會，黃碧雲的生活起了翻天覆地的變化，「做咗立法會議員後，整個生活癲倒咗，由好安靜嘅教學生活，到依家生活變得好立體，各方面都好忙碌。」

有人形容屬豬的人比較勤奮和勇敢，黃碧雲笑言當立法會議員後，「呢隻豬要變得更加勤加」，面對各種政治和選舉考驗，亦要變得更勇猛。

民主黨前「大腦」、勞福局局長羅致光早前爆出「60歲中年論」；即將踏入花甲之年的黃碧雲形容自己正處於黃金時期，「我從政起步較遲，現在人生經驗、從政經歷都累積咗，我覺得係一個黃金嘅時間，希望自己可以喺社區同民主運動走多一里路，作出一啲貢獻！」

60歲亦為理大講師和教授的退休年齡，黃碧雲將於今年6月結束二十多年的教學生涯。卸任講師身份後，黃碧雲表明將全心投入立會工作，處理議會和地區議題。

公民黨陳淑莊

陳淑莊小時候與公公、婆婆同住，長大於上海家庭。每逢農曆新年，婆婆會親自準備茶葉蛋和雪耳糖水，使她回味至今，「呢兩樣食物我非常回味，從此我都無再食過拍得著阿婆整嘅好味嘅茶葉蛋」。

陳淑莊最期待的賀年節目，就是到北角皇都戲院和國都戲院看賀戲片，「無乜嘢做嘅話，就會同屋企人，碌落斜路睇賀歲片，不過最怕就係戲院地下好多瓜子殼，我好想睇賀戲片，但又好怕啲瓜子殼，好唔衛生！」

12年前的陳淑莊仍是舞台劇演員，她憶述在2006年的冬天，她首次參與公共選舉，出戰特首選委會選舉，成為她從政的起步點。參政12年，陳淑莊坦言仍有很多地方需要學習，「當然好多嘢想做，仲有好多地方想去，覺得自己仲識好少嘢，希望可以學多啲嘢。」被問到來年的目標，她希望盡好議員的責任，又盼公民黨和支持民主的同路人在年底的區議會選舉取得好成績。

民主黨鄺俊宇

2007年，當時年僅24歲的鄺俊宇成功當選區議員，當時他已經非常關注動物權益的議題，首項在區議會提出的動議，就是關注動物被虐殺，他憶述當時有警方代表見到議案後，不屑地向他說：「呢啲嘢都係交番比啲貓議員做。」當時鄺俊宇反駁：「咁我話貓狗無議票，唔識講人話，我哋應該幫佢哋手。」鄺俊宇亦因此被稱為「貓議員」。

12年過去，鄺俊宇已晉身立法會，他仍為動物權益奮鬥，在立法會提出的首個議員議案，正正就是關於動物福利法，「唔經唔覺過咗12年，睇返今天，入到立法會第一個議案又係講動物福利法，回望十幾年喺動物權益上，終於有啲成績，但最緊要係初心，初心係希望做多啲見得到嘅政策、觸得到改變。」

今年將是鄺俊宇度過的第三個豬年，他呼籲大家珍惜身邊屬豬的朋友，「豬相對畀人感覺勤力或者比較聰明，豬亦都好可愛，屬豬嘅朋友都係1983年出世，我成日都覺得1983年係一個特別年份，因為我哋都喺最精彩嘅80年代長大。」

專業議政、衛生服務界李國麟

隨著豬年來臨，李國麟將踩入60歲大關。12年前，他已經是代表衛生服務界的立法會議員，他憶述當時亦是受醫護人手不足和醫療系統爆煲問題困擾。可是過了12年，情況仍然嚴重，甚至比當時惡化。李國麟對此亦有所感慨，「我喺呢個護理專業做咗三十幾年，由臨床到教學，護士人手從來都唔夠，政府無正視過呢個問題，其實唔係講投入資源問題，而係要有長遠規劃。」

他希望來年醫療系統能避免現在所面對醫院「爆棚」和系統爆煲的現象，公營醫院管理層的政策能夠到位，不要讓前線同事疲於奔命。

至於兒時的農曆新年，他最期待就是可以穿新衫，「我記得細個新年好開心，最期待幾樣嘢，第一就係新衫！嗰時得新年先有新衫，其他時間無新衫。」加上可吃到平日吃不到的食物，例如瑞士糖、朱古力。