【少年毒販】交收衫褲竟暗藏K仔 「當他們是朋友為最大錯誤」
近月有多宗青少年以身犯險，圖將毒品販運出境的案件，他們不約而同為的可能只是數千元「快錢」。對於16歲的阿明（化名）而言，看到有關新聞，等於看到2年前的自己，曾在懵然不知下成為少年毒販，至被執法人員「放蛇」拘捕，才驚知紙袋內的衣衫底下竟藏有逾2公斤「K仔」。
意想不到的一場「交收」，結局是近年半在教導所度過，更與其中一名令他走上歪路的損友碰頭，阿明驀然回首，當初對方的「洗費全包」、「正常外快」不是義氣，而是「兩部曲」陷阱，所謂「朋友」？「幾百蚊就可以無咗你呢個人存在。」
「當日朋友叫我幫手拎啲嘢俾人……喺觀塘一個商場……行行下，有人從後夾住、攬住我，問我老細係邊個啊……」看着手中紙袋普通不過，有幾件衣衫蓋面，阿明憶述，當時仍一頭無緒，直至執法人員表明身分，將他帶走問話，始知藏著幾包共逾2公斤「K仔」。
「好震驚！」當時快滿14歲的阿明不敢置信，「2公斤幾喎！大佬！睇電視啲人索都係丁屎咁多，（朋友）都係同我差唔多大嘅細路啊，點會攞到幾十萬嘅嘢返嚟…嘩…原來我揸住咁多嘢啊？」直至檢驗報告出爐，他才如夢初醒，自己是如何被牽進「毒販之路」。
第一步︰洗費全包 吃喝玩樂中放下戒心
剛升讀中一，因成績不理想而氣餒，阿明放學後便到機舖、桌球室流連，因而認識到一群「有背景」的同齡朋友，但阿明不以為然，「我無背景咪得囉。」起初只是食飯有個伴，後來一切玩樂洗費由對方大方「全包」，「每日打機、篤波、唱K，就連搭車都係佢哋出錢…可能因為咁，先會鍾意痴住佢哋玩」。
阿明坦言這「循序漸進」的過程，令他覺得被對方視為「朋友」，「有咩利益都會俾我」，故當對方有所求，「都唔好意思托手肘」。
延伸閱讀：【少年毒販】1克毒至少囚2年 律師詳解︰為何不知情難成求情理由
第二步︰交收模型開始 暗藏毒品「中伏」
相處約一年後，「朋友」開始不時向阿明「洗腦」，如「阿邊個試過幾次啦」、「14歲唔會有事」、「最多感化令」等，但阿明都只是幫過他們到港鐵交收網上拍賣所得的玩具模型，亦一直不察覺有異常，惟至「中伏」那次。
一如往常，「朋友」談好時間、見面地點，便把貨交給阿明，再叫他帶到指定場所，惟不會告知阿明收貨人的特徵，只要待至有人前來相認，完成後可獲數百元報酬，「包裝到好似普通打工賺錢咁」，他坦言「當時對住朋友唔會有戒心，換轉係陌生人就唔會咁做」。
唔會係朋友…在佢哋嘅世界…你只係一個價值單位，只係幾百蚊就可以無咗你呢個人嘅存在，有幾多錢就可以出賣你。
「我當佢哋係朋友」是最大的錯誤
即使阿明堅稱不知情，有關毒品包裝上亦無他的指紋，惟最終仍被判販運危險藥物罪成，並須入教導所，結果度過1年半的歲月，但阿明在鐵窗無自棄，報讀文憑試班，用了10個月時間備考DSE，全部科目合格。
在阿明出事後，昔日「江湖兄弟」隨即不見蹤影，但竟在教導所中再碰頭，「仲係我第一個認識的所謂朋友……你都有今日啦……做錯事接受懲罰好應該」。
反而現時從新聞中不時看到有同齡人衰販毒，讓阿明深深感觸，尤其是有一宗15歲少女拖行李篋，企圖將市值近2000萬元的可卡因「衝關」，直言「好誇張」，「愈攞愈多，販毒集團可能利用小朋友傻吓傻吓呢點」。
他以「過來人」身分坦言，當初自己以為過年少會無事是「好白痴」，「你話你唔知，唔會係一個藉口，的確事實係我攞住袋嘢」。
