【生活百科】潔癖人士注意! 一文睇晒4招減少家居塵埃積聚

撰文:熱評
出版:更新:

文:裝修佬
日常生活中,無論你再勤力打掃屋企都好,塵埃都依然存在。有陣時冇打掃一兩個星期,塵埃更加可以積到幾吋厚!原來塵埃容易積聚,好可能係同生活習慣同埋所用嘅日用品有關,想知道點樣有效減少家居塵埃問題,就要睇睇以下內容喇 !

電器待機時會吸引塵埃,如不會使用,應直接關上電源,減少塵埃積聚。(GettyImages/視覺中國)

下載「香港01」App ,即睇城中熱話:https://hk01.app.link/qIZYuEC5LO

電器唔好用待機模式

當電器喺待機模式嘅時候,其實仲係帶電,帶電嘅電器係會吸引塵埃(例如最常用到待機模式嘅就係電視機喇)。當電器未有需要用嘅時候,最好就將電源完全切斷,咁就有效減少電器表面塵埃嘅積聚喇!

番到屋企立即除鞋換衫

經過漫長嘅一日之後,衫褲同鞋都會黐滿大量塵埃,如果返到屋企唔即時換睡衣、唔除鞋就周屋走嘅話,就會抹極都仲係一屋塵喇 !

家中針織物品容易「吸塵」,可以考慮使用其他物料,否則就需要勤力清潔。(GettyImages/視覺中國)

減少使用針織物料

屋企嘅針織物料物品,例如係窗簾、被鋪、布梳化等等都好容易令塵埃積聚。只要減少使用一些不必要嘅針織物料,例如係選用皮梳化就可以避免塵埃堆積。加上定期清洗床單、被鋪同埋窗簾等物品,都能夠減少塵埃㗎 ! 如果唔能夠清洗嘅物料,例如係布梳化等,亦都要經常吸塵、打掃一下呀!

善用收納箱

報紙雜誌其實係好黐塵,而且唔容易清潔;所以如果大家鍾意睇報紙雜誌嘅話,最好就用有蓋嘅收納箱整理好報紙雜誌,咁樣就無咁容易積塵而且方便日後打掃喇 !

作者簡介:
裝修佬是家居裝修奇難雜症專家,希望透過文章分享及網上互動,解答巿民各式裝修難題,改變大眾對裝修方式和置家理念。

作者facebook專頁:https://www.facebook.com/hkdecoman/

(文章標題由《香港01》編輯所擬。文章純屬作者意見,不代表《香港01》立場。)