【特首選戰】換個人等於香港重光?所以我無開香檳慶祝

撰文:李聲揚
出版:更新:
最大問題?梗係買唔起樓,住又住得細,社會流動性低,人工加得慢,嘢又貴,又睇唔到機會上位。再加上就係中港矛盾,怕傳統消失……我大膽估計,以上呢一大堆嘢,全部都唔係換個人可以解決。
李聲揚
梁振英宣布不競逐連任當晚,有市民開香檳慶祝。(Getty Images)

照舊,小故事開頭:

2009年,柏林圍牆倒下20周年,德國《明鏡周刊》(Der Spiegel)做咗個調查,對象係前東德人。大家估下,有幾多人覺得東德好嘢多過衰嘢?

答案係,57%嘅人認為東德整體嚟講都幾好。當中更有8%嘅人覺得東德好過而家(2009)。冇自由?受訪者話,而家你冇錢一樣出唔到國。

殺咗希魔又如何

梁振英宣布唔連任當晚,我冇去慶祝。事實上我唔知有乜好慶祝。今年我估乜錯乜,估法國拎歐洲國家盃,估英國留歐,估希拉里當選,估梁振英連任,全部錯晒。當晚我去咗睇戲,德國片,《決命13分鐘》(13 Minutes)。

《13 Minutes》電影宣傳海報。

套戲講有位仁兄,想裝炸彈炸死希特拉,可惜希魔演講提前13分鐘結束,逃過一劫。「如果希特拉死咗會點」係好熱門嘅題材,由歷史書辯論比賽到小說電影創作都有。電子遊戲《Red Alert》更加設定愛因斯坦發明時光機回到過去殺咗希魔。連避孕套廣告都拎過嚟玩,「將惡魔消滅於萌芽狀態」。

問題係,殺咗希魔,又如何?英雄(或狂人)做時勢定時勢做英雄,拗餐懵冇乜結果。希魔係咪民主選出嚟,留返葉劉淑儀同蔡子強慢慢拗,但幾肯定嘅係,希魔上台有其歷史背景,甚至必然性。

你讀書都會讀到,《凡爾賽條約》逼到德國埋牆角,經濟蕭條,通脹飛升,人人冇工開,反共產主義。希魔可能唔係「民主選出嚟」,但佢嘅「Make Germany great again!」(我作的)背後肯定有強大民意支持,唔係希魔一人說了算。納粹戰犯好多死不悔改,亦唔係希魔幫佢哋打咗懵仔針。《決命13分鐘》入面主角畀人酷刑逼供,納粹唔信佢一個人行事,最後主角都忍唔住爆咗句「我都唔明點解得我一個!」,夠晒黑色幽默。

希特拉的理念背後有強大民意支持,不是他一人說了算。(Getty Images)

莫高估一男子影響力

講希魔太極端的話,講下我都好關心嘅東歐。東德有Ostalgia(Ost係東,加上nostalgia懷舊),南斯拉夫解體後嘅國家有Yugo-nostalgia,蘇聯一樣有Soviet nostalgia。並唔只係拍戲講下懷念當年,而係好似東德人咁,真心覺得當年都唔係咁差。以前係專制,但人人平等一齊窮,有書讀有屋住有工開有拖拍。

「變天」後,裙帶資本主義盛行,「平均」有錢咗但冇你分,人慾橫流,做官嘅一樣係「變天」前嗰班人,冇關係嘅大學都冇得你讀工都冇得你返,樓就炒到貴一貴,女就畀啲才俊溝晒……係咪好有親切感呢?以上種種非我創作,你去開巴爾幹各國可以問下當地人。

再講落去,大把例子。小布殊神憎鬼厭,奧巴馬打「Change」牌強勢上台,然後大家發現佢嘅Change係假嘅,只係富人更富樓更貴普通人生活更差。馬英九畀人話親共賣台,蔡英文上台時台灣香港年輕人捧到佢上天,結果佢民望跌得仲快過陳水扁同馬英九。

唔好忘記,美國同台灣嘅例子都係(相當真嘅)民主選舉,政黨交替兼換人。 之前講東德蘇聯南斯拉夫嗰啲仲勁,直頭成個制度推翻埋,但都不過如此。點解有人覺得冇咗梁振英就美麗新世界?「一男子」影響力真係有咁大?直逼希魔?

蔡英文曾深受年輕人歡迎,上任後民望卻不停下跌。(路透社)

香港人想要的 不是民主自由

對,梁振英好多令大家扯火嘅嘢,都可以歸入佢個人因素。UGL啦,「行李門」啦,仲有「白宮發言人」等等,可能換咗第個就冇呢堆東西嘅。但唔好忘記,當年唐英年一樣畀人覺得「私德」唔好,日日失言,又僭建又有感情缺失,我仲記得當年Facebook全部都係唐唐嘅改圖。更唔好講而家人人懷念當年畀人插到七彩嘅「貪曾」。

我曾經同朋友討論,我話,香港人其實根本唔係想要民主自由,亦唔係要自決。證據?好簡單,試下聽日話回歸英國,或者併入做日本領土,睇下而家要民主嘅年青人贊唔贊成?大把香港人羨慕上唔到ThisAV或者上YouTube貼段片畀人拉嘅新加坡添,而講nostalgia,回歸之前你都冇得選港督,對不?

朋友反駁話,民主自決之類,只係個手段,最終追求嘅先係重點。佢講得十分有道理。所以我就問下,而家最切身影響你同身邊嘅人嘅,其實係乜?斷估唔係特首夫人嘅衣著品味嘛?

問我身邊嘅人,其實都係嗰幾味,同之前講東德南斯拉夫蘇聯都差不多。最大問題?梗係買唔起樓,住又住得細,社會流動性低,人工加得慢,嘢又貴,又睇唔到機會上位。再加上就係中港矛盾,怕傳統消失,仲有身分認同等等東西,對不?

再次證明其實阿爺好睇民意

我大膽估計,以上呢一大堆嘢,全部都唔係換個人可以解決。人工停滯不前發展機會少流動性低等等,全球問題,英國脫歐同特朗普上台都係同一回事,全球化節節敗退就係咁回事。大家把口講普世價值,但其實冇飯開冇工開買唔到樓,就乜極端思想都迫到出嚟,希魔上台都係咁上下環境。 

另外嘅一堆,但凡涉及中港矛盾嘅,可能係香港獨有,但亦不見得換個特首就改變到。請循其本,經過「DQ門」,特首宣誓係效忠邊個,大家應該好清楚。至於估北京會軟化呀等等,我就覺得發夢冇咁早。北京近年愈嚟愈強硬,周不時有人狠批,但係咪只對香港硬?好似唔係。既然係咁,係咪睇得自己,或者區區一個特首,太重要?

董建華「腳痛」下台及今次梁振英放棄爭取連任,均顯示中央絕非不聽香港民意。(Getty Images)

今次梁振英疑似「被DQ」,最大啟示係再話一次你知,「其實阿爺都好睇民意」。想吐血?真的,兩年七一遊行後,盡失民心嘅董建華就「腳痛」下台。 原本真命天子係唐英年,但佢多醜聞冇民意,就醒件梁振英畀你。而家梁振英冇民望,就又換過咯。你估解唔解決到問題?

話開香檳要慶祝嘅,我見到包括楊岳橋歐錦棠王宗堯麥明詩等等(唔好誤會, 我對佢哋冇意見。利申:我投公民黨的)。仲見到有啲朋友貼「香港重光紀念日」,不妨立此存照,睇下4年後佢哋仲係咪笑得出?放心,Facebook會提返佢哋。你想忘記歷史,但歷史唔會忘記你。我估,將來幾年,佢哋貼「香港最黑暗一天」「法治已死」「香港唔係我熟悉嘅香港」嘅機會比較大。

(文章純屬作者意見,不代表香港01立場。)