【特首選舉．來稿】從揀老公學揀特首　曾俊華是筍盤的四個原因

俗語有云：「搵份好工不如搵個好老公。」
女人過三十，呢句說話特別深刻。畀個打工皇后你做，重點都係要做，然後等回報，月復月、年復年，就會認清搵個可靠的男人付託終生才是上策。
香港人揀特首，其實都有這種中女心態。曾俊華自宣佈參選，一直民望高企，拋離另外幾位候選人十個八個馬位，令他夠膽恥笑林鄭在社交媒體上的嬲嬲多到上鼻，同時為自己的心心眼已經浸上眼眉而沾沾自喜，成為全香港最搶手筍盤。令全香港人「唔要真普選，都要曾特首。」就是憑藉以下絕世好老公的包裝。

文：金子悅

他是打工皇帝

香港地，九成都係打工仔，你的職場智慧如何，你的前途也必如何。從 1982 年加入政府做地區政務專員，到拍住曾蔭權登上財政司司長高位，一坐十載，曾俊華最叻係 expectation management，即係「期望管理」。每年財政預算案，他必然先低開盈餘盤口，甚至試過揚言「可能有赤字」，然後年年爆數、庫房水浸，面對老闆，他作為最高揸數人的 KPI 永遠最亮麗，就算換幾多上司，都可以憑業績穩如泰山，月月有糧出。

曾俊華第二樣職場高招，是他懂得韜光養晦。當盲人都知道，個頂頭上司係＿街、係人渣，恃住有老闆做靠山假公濟私兼無料扮四條，而且，佢唔妥你。要保住份工，對付／應付上司的最佳方法，莫過於曾俊華的親身示範：對內，要大事勿用，即係少做少錯，唔做唔錯。過去五年，這位財爺一味靠慳的招數大家都見識過，財政預算案年年都是一樣葫蘆，其餘就事不關己己不勞心。對外，要畀足面子上司，以最高姿態扮蠢扮順民，一句「You always agree with your boss. No question about that.」向全港打工仔送上一課最佳公民教育，大方得體又語帶雙關公告天下：老細英唔英明我唔知，但老細永遠是對的。

他有鴻圖大志

做財爺，有什麼好處？年薪三百幾萬、入住壽山村道官邸同誠哥做鄰居、仲有FS車牌專車接送同高官特權，圓滿卸任後，有得咬長糧仲有大把過千萬年薪的大企業顧問筍工任君選擇，是高官最完美出路。

但他選擇在 689 宣佈不連任後立即遞辭職信，表明競逐下任特首意向，他自信做得比眼前人更好更面面俱圓，於是無中央欽點也好（據說），無經費支持也好（據說），自組班底、搞眾籌、成立競選辦公室，去馬。

就好似一個事業如日中天的男人，不甘原地踏步，放棄高薪厚職做 startup，如此勵志故事的男主角特別有魅力，但面對住千二個集體意志的選委，他的挾民意以令選票都是一步兵行險著。日劇《四重奏》有段對白：

「男人在二十多歲有夢想，能讓他閃閃發亮；三十多歲還追夢，已是一文不值。」

我不同意，男人有志氣一定會加分，睇曾俊華就知。六十有五，不只繼續追逐自己夢想，也在勢危中向他人送上夢想，公開話：「選特首是為香港重建信任、團結與希望。」又同素未謀面的的網民講：「願天佑我城。」

因為正能量，是人見人愛的。

他公關做得好

正如黃子華名言：

「做人，公關做得唔好，食屎㗎啦。」

兩個月的密集式出招，大家有眼睇，林鄭都食到滯滯地、胡官乏人問津、葉劉呢……

點為之「公關做得好」？大可請教黎明，經過今次特首競選，曾俊華是輸是贏，也絕對可以成為 case study。

近年中外有太多「素人 vs 政棍」的政治選舉由識玩新媒體的素人勝出。網上（以社媒／論壇為主）的威力有幾大，不需要再解釋，而這些趨勢，我不相信其他候選人看不通。只是，就特首選舉的特質，大家都本著選票為本的宗旨，集中火力打大佬，慳水慳力向市民，而曾俊華在每一個場口，都表現到「就算臨時演都係演員」的專業態度：你連廁紙都未識買呀？我就去食茶記篤豬腸粉；你話我 hea 呀？我搵你個舊下屬撐我場兼送上一塊「義氣仔女」牌匾；你連個退休教授都搞唔掂？我四方八面有支持者湧出來幫推。

曾俊華的公關好在，他與任何人都可以演化出一個故事。Good PR 就係 good story teller，比起純口號的「We Connect」更加多 connected 的人脈關係，由理所當然的（太太曾黃蓮華、智囊羅永聰）到估你唔到的（陳慧珊、趙式慶、麥齊光、杜琪峰！），賣故事令到曾俊華更貼地更看似政治素人，比起另一邊內置官腔程式的林鄭，自然討好得多。

他不遺餘力氹你高興

賣完故事，他還向你兜售願景。

他說會成立動物警察、取消TSA、不發展郊野公園，無孔不入地在各大小媒體重申自己作為天主教徒、父親、運動員、老師的身份和使命，仙女散花投其所好，務求總有一樣正中要害。

嫌願景太遙遠，他就跟你情話綿綿。層出不窮的競選文案有「相信一個人 不如相信每一個人」、「一個更加好的香港」「喺2017年3月24號呢個晚上，我哋香港人曾經走埋一齊」……（下刪十數個），係肉麻，但就好似從前無人同你講過「我愛你」，而家有人日日向你示愛、跟你講將來，告訴你他最緊張你，想由他親手給你幸福，很難不給感動。就算他已經一腳踩下支持廿三條立法、政改遵循人大八三一框架的香港人底線，都可以四兩撥千斤避開流彈。

憑四招，令曾俊華「眾望所歸」，令大部分原本死守貞操帶的泛民港人都堅信他已是最好的選擇。

問題來了，有個男人，有齊以上條件，絕對嫁得過，不過他不是你揀的。你依然真心覺得眼前這個男人可靠？

如果香港是一個連自由嫁娶都無權的女人，曾俊華確是一個做足準備的金龜，有雄才偉略又夠體面。一邊出盡渾身解數，令你愛上他相信他，他有缺點？只是權宜之計，為頭家日後穩定繁榮著想，免得日日家嘈屋閉。另一邊廂，這樣一個深謀遠慮的男人，面對執掌最終嫁娶權的外父，會不會又是另一副口面？你個女只愛我一個，你交畀人，長遠都係會唔聽教，而家我搭好場口，你順水推舟，我以後一定會好好孝順你老人家，大家都有安樂日子過。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）