【博評】玩Pokemon GO可以捱夜企街,為投票一樣可以!

撰文:詩寧
出版:更新:

這屆立法會選舉有多達220萬選民投票(總投票率58%)!2004年立法會選舉,在沙士及50萬人七一遊行後,投票的選民數字是1,784,406(總投票率55.64%),可見選民比當年更想改變、更投入政治。
Facebook所見,不少政治冷感的朋友都在票站前selfie打卡,更自豪地說首次一家大細總動員投票,這當然是近年社會風氣迫選民出來,但不少候選人善用社交媒體作宣傳策略及Pokemon GO令港人習慣夜媽媽喺街行、喺街企也功不可沒。

今次立法會選舉,Facebook首次在香港推出「選舉大聲公」功能,提醒選民是投票日之外,也讓選民打卡。(資料圖片)

Facebook VS 街站大聲公  Facebook 勝!

這屆立法選舉新人輩出,包括:用菜籃、單車加十幾枝旗跑出的票王朱凱迪;年僅23歲、史上最年輕的立法會議員羅冠聰;唔知點解係暢銷作家的鄺俊宇;上位極快的滅鼠女神游蕙禎;大專講師去做小販的劉小麗;鄭松泰、梁頌恆等等。

啲契仔契女唔講,講吓無乜資源嘅新丁幾叻用社交媒體。

你實話我馬後炮,但選舉前由朱凱廸Facebook的洗版程度中,我真心覺得佢會高票當選。當然要靠佢本身辯才高、熟書、敢提出香港少人談及的觀點,令他在各選舉論壇中大放異彩,但他的團隊懂得將獨到的論述剪成短短幾分鐘放到Facebook實在是醒!例如朱凱迪指田北辰是西鐵票價高的始作俑者,鏡頭不花巧但製作組在片中加上字幕及數據,令成日趕時間嘅香港人可以輕易認識朱。最重要是選題夠叻,西鐵喎!錢喎!幾多住慣九龍嘅年輕人為上車搬入新西,明明細個笑人住元朗騎牛,而家要死死地氣話西鐵好方便,不就是因為錢?鬧西鐵貴絕對無新西人會反對的。

朱凱廸其中一個主打議題是西鐵票價。(朱凱廸宣傳片擷圖)

相反,經驗豐富的候選人,沿用街站、橫額、大聲公、大量義工狂派傳單。街站、傳單,你見到會點?我見到就行快幾步,驚死佢迫我拎嘢,拎完又要搵垃圾筒掉,去到前面個垃圾筒,見到已經畀傳單塞滿,結果我無位掉,又要拎多陣。橫額?通常笑吓個候選人幅相比人插穿眼,然後留意唔到其他訊息。大聲公就更煩,由朝嘈到晚,唔能夠令人用心聽內容之餘,仲好希望投票日快啲完,我小學嗰陣就因為周街大聲公而好憎立法會選舉,嘈住我溫書準備考試/瞓晏覺。

Facebook在父母輩的滲透率也很高

羅冠聰、鄺俊宇、游蕙禎等等玩Facebook點樣好我唔逐一數,重點係今時今日嘅Facebook唔只後生會玩,你阿爸阿媽阿婆都會玩,阿仔成日share某啲候選人,阿媽都會見到,見見吓熟口熟面又投多票。

有朋友C同我講,佢媽媽對Facebook一知半解,喺媽媽心目中,Facebook就係用來了解親朋戚友嘅,所以會喺Newsfeed出現嘅人就係「朋友」,朋友C share咗鄺俊宇選舉嘅相,媽媽竟然以為鄺俊宇好有誠意咁做咗佢朋友,「入嚟」佢Facebook拉票,係呀,感覺就好似去佢屋企門口拉票咁,結果鄺俊宇就得到C媽媽一票。

可以為Pokemon GO捱夜 為投票都可以

Pokemon GO這個遊戲,令好多一家大細晚飯後落街散步,的確拉近了家人關係。以前新年、中秋都未必會成家人喺條街企成個鐘,Pokemon GO令香港人發現「夜媽媽一齊聚集原來不怪」,仲幾值得添。太古城、藍田麗港城等票站都出現投票到凌晨的情況,最大原因當然是選民的熱情和堅持,大家都想為社會出一分力!但Pokemon GO亦讓大家知道「喺街打機到凌晨,第二日都返到工」。更何況今次係為自己的家、自己的下一代?為珍惜手上一票而瞓少啲,夜都要等。選民用四年去看清議會內外誰人誰鬼,若錯過這表態機會,誰知還有沒有下一次?

(左) 大批市民排隊等候投票。(右) 大批市民聚集在天秀公園玩Pokemon GO。

無論是追求「啟暴龍」定「香港的未來」,原來香港人還會為「喜愛」、「熱情」而聚在一起;除了吃喝玩樂,大家還會為「責任」而犧牲寶貴的休息時間,一班陌生人為同一件事、同一理念喺街企一晚其實好溫馨。

風雨飄搖,希望一眾立會新丁,真係會用心為香港帶來新氣象,不要辜負選民神聖一票,因為投完票加上緊張點票,結果瞓唔着,第二日返工真係好辛苦!

(文章純屬作者意見,不代表香港01立場。)