【上車難】300呎新樓盛惠1,000萬 JW《矛盾一生》唱盡港女苦況…
香港瘋狂樓價下，最大受害者大概係28歲港女，以及她們的男朋友。現年28歲的港女，假如在大學時結識青梅竹馬的同級男同學，視乎學制以及選科，大概在2010-2012年之間畢業。根據樓價走勢，單純以「可結婚能力」（Marry-ablity）來分析，可謂最倒霉的一代人。
原因簡單不過：1998-2003年樓價低潮，貝沙灣1000呎單位開賣，450萬有成交。
2004年起曾蔭權上台，經濟復甦，樓價升到2007年「高位」（對比今日簡直只能說是谷底），在2008年小崩盤，雖無2003年咁平，但總算十分Affordable，幾百萬就買到1000呎單位，雖然未必係豪宅級數。
2009年開始樓價急升，到2011年已經話到左「97高峰位」，有醫生律師打電話上電台節目，投訴買唔起樓，成為一時佳話。
2012年前，好多人Predict 梁振英上台樓市會大跌，結果全部中伏，樓市經歷前所未見的強勁升幅，一直升到2018的今日依然未停止。
而28歲港女，以及她的男朋友，正正在2010-2012年畢業，從拍拖的第三年開始，正常情侶肯定開始談婚論嫁，尤其女方通常比較著緊，惟2013-2015的樓價，已經又比當初升左好多。
Logically speaking，2013-2015年，樓市已經處於遠超1997的高峰，男方通常傾向等一等，原因係：
1) 根據傳統智慧，無理由咁笨喺高位接貨
2) 哪有錢.jpg，呢刻根本就買唔起
3) 我地都仲細，等下先。
反之，女方的考慮，通常係：
1) 而家唔買，遲啲仲貴
2) 點都要一個家自住，唔好理咁多，總之就要買樓啦
3) 女仔轉頭就30歲，我希望28歲前一定要結婚囉。
當然，2013-2018的今日，with the benefit of hindsight，大家都知道事態係點發生：香港樓市的新常態，已經係300呎新樓賣1000萬。1000萬就係新的「上車盤」。
換言之，28歲港女與男朋友等到今日，2013年兩小無猜時買唔起，今日更加買唔起。
呢個話題，都係前排大熱的流行歌《矛盾一生》的內容，亦觸發了港男 vs 港女的大辯論，仲激烈過今日的林鄭土地大辯論。
歌詞中的男主角「拖拖拉拉最後還是不發奮」，令女主角亦即歌手JW 「永遠看不見未來，被愛軟禁」。
《矛盾一生》全曲的中心訴求，正正係男生唔發奮上進，「竟會沒決心成家」，不停追問男生「你沒想過未來，對吧？」
MV內容更加生動，其中一幕正正係兩人在地產鋪門口，女主角想睇樓，憧憬有一個屬於自己的家，男生卻了無興趣拉走她。
最終，女主角終於痛定思痛，「當你遲遲未改變，就讓我改變吧」，將唔出色唔上進的男友飛了。
JW首歌，短短三年，在Youtube上已經得到1500萬個Views，再睇埋留言，一面倒係典型的「28歲港女」分享自己的類似經歷。有人話：「唔好誤會，女仔想要的唔係富貴，而係安全感和希望。」究竟，咩係安全感與希望？
諷刺的是，真實世界的JW，據說本身出身中產家庭，如今同某大集團太子爺拍拖，家族身家以十億計，經常出入馬場等上流社會場所。
呢個時候，或者可以用另一首同樣大熱的流行歌 《高山低谷》分析：推出時間早幾個月，瀏覽亦達到1700萬個Views。早出的《高山低谷》的歌詞，竟然對後來的《矛盾一生》的女生訴說了自己的心聲。
相對《矛盾一生》控訴式的歌詞，《高山低谷》更多係表達男生的無奈，以及絕望的喃喃自語：「你那貴族遊戲，我的街角遊記，天真到信真心，太兒戲……愈望愈無望，未來沒有我。」你（嚮往）出入Jockey Club，我只食得起$39.9 的吉野家。
或者，那位女生已經Made up her mind，決心過她的上等人生活，男生的窮小子永遠愛不起。 「你快樂過生活，我拼命去生存，幾多人位於山之巔俯瞰我的疲倦。」
即使幾努力，28歲男生月入還是28k左右，本身其實已經唔算太差，但呢個年代確實連「成家立室」都唔夠，更何況係面對有錢人世界，28k更係被秒殺：JW的男朋友在貴賓廳落注，買其中一場馬，已經使左3萬，眼都唔眨，談笑風生，開著新落地400萬的McLaren跑車開往淺水灣的別墅。
究竟，葉的離去，是因為風的追求，還是樹的不挽留？
的確，呢種情況，又唔應該一面倒非黑即白，一係女生貪慕虛榮，一係男生唔上進無出色。
只能說，呢個樓市瘋狂年代，確實拆散了好多本身的大好姻緣。
28歲港女，需要結婚生仔，正如星加坡李光耀講過係Child-bearing age，當然亦需要一個家，需要過相對體面的生活，係事實。
28歲港男，努力工作下月入3萬都算係咁，但假如無家底，則無乜可能買得起樓結得起婚，亦係事實。畢竟，有幾多人可以28歲就月入10萬銀行儲左200萬買樓有望？ 大概只有Top 0.5%的超級精英。但我們99.5%的大部分人，難道就賤過地底泥嗎？
撇除少部分貪慕虛榮的港女，以及少部分懶到出汁的港男，大部分28歲港男港女，其實不過腳踏實地，希望安居樂業而已。And this city has failed them.
然後再引伸到一個問題：究竟，呢個年代的男生，點先算有出色？以前月入3萬已經夠養家活兒，今時今日又要幾多？難道，真的 100k is the new 30k?
28歲港女的宿命，正如28歲港男的宿命，某程度其實真係社會的錯。
起碼係某程度。
SJ結語
女：矛盾只因心愛著，你知嗎？
男：我只知，1000萬樓要500萬首期，唔去日本每個月儲2萬，都要儲21年，大學畢業開始儲，要起碼到42歲先夠首期。
女：痛定思痛，未來算吧。
然後登上跑車揚長而去。
【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】