【母親節】被丈夫拋棄曾尋死 薛家燕捱大仔女:我對佢哋有虧欠

撰文:鄧煥儀
出版:更新:

薛家燕童星出身,是本港家喻戶曉的演藝人物。「好姨」、「家燕媽媽」、「Captain Nancy」,都是她在不同年代的經典形象。剛踏入七十歲的她,演藝事業一片輝煌。鎂光燈背後,她同時是個育有三名子女的單親媽媽。婚姻的不如意,令她一度走進情緒低谷。回望過去,她坦言對子女帶著虧欠;而對前夫,則沒懷怨恨。「你覺得呢個係我最愛嘅人,冇左佢唔掂。但其實唔係㗎,你冇左佢,可能更加掂!」

傳統婚姻觀

薛家燕8歲便加入演藝圈,歌、影、視的發展令人印象深刻。28歲,事業正直如日方中,她毅然決定退出幕前,經營錄影帶生意,原因是為婚姻鋪路。

「我係一個好傳統嘅女性,覺得最重要都是有一個好家庭,生兒育女。我好愛我嘅事業,但我一路冇正式拍拖,只係同圈中朋友成為好朋友。如果進一步的感情,父母是反對的。佢哋覺得圈中人男仔唔係咁穩陣,好希望我識返啲圈外人,當時嘅我覺得父母都講得幾啱喎。所以我28歲嗰年決定正式退出娛樂圈,做錄影帶生意,咁樣鋪路,因為我希望能夠搵到我嘅Mr. Right。」

婚姻破裂 一度輕生

退出幕前不久,她結識了圈外丈夫,未幾成婚。「曾經有段日子好快樂,因為我好愛我先生,我亦都很喜歡小朋友。我三十幾歲才結婚,算是遲婚,所以我一結婚就即刻要有仔女。好好計劃,兩年一個,生咗兩個女、一個仔,但好可惜段婚姻只係維持咗十年。」

當年家燕姐的丈夫驟然離開妻子與子女,她坦言,當時堅信他最終會回來。「我初初諗,唔緊要丫,佢唔愛我,我可以接受,但佢一定會愛佢啲小朋友,所以我就話,『佢始終會返嚟見佢哋,我要等佢』。當然當時唔會話俾人聽,我老公走咗,亦教三個仔女,如果人哋問爸爸去邊,話佢出咗差。但係好可惜一路咁樣等,等咗三年,佢都冇出現,我就決定申請離婚。」

婚姻的破裂,令家燕姐一度陷入情緒低谷。「當時我係覺得沮喪,覺得世界末日,我覺得女人最成功係嫁到一個好丈夫,有個完美嘅家,你愛嘅人都愛你。但你發覺自己咁愛嘅人,竟然拋棄自己,連啲仔女都唔要,就覺得自己好失敗,諗唔到前面條路可以點行,唔想面對,想跳樓,不如走咗去算。」幸運的是,子女把她喊回來。「我啲仔女嗌住我,阿仔仲話,『啲薯條加啲茄汁,好好食㗎。』我帶佢哋嚟呢個世界,佢哋冇錯㗎,我走咗去,佢哋咪好陰公。好彩冇跳落去,如果跳咗落去,我就冇左後面嗰段美好人生。所以而家我好多時都同啲朋友講,當你遇到挫折,千祈唔好絕望,柳暗花明又一村,如果你能夠跨越呢個逆境,你可以更上一層樓。」

復出演藝圈 兼顧家庭和工作

四十多歲的家燕姐一時間成為家庭的經濟支柱,曾經做地產、保險,以增加收入,卻發現原來不那麼容易。「尤其是做慣演藝事業,你出嚟做啲咩好呢?好似同班年青人爭工做咁,好徬惶。」這個時候,劇集《真情》「好姨」這個角色,帶給她廣告、電影、登台演出、錄唱片等不同機會,讓她再度攀上事業高峰。「嘩我真係開心到不得了,原來我四十幾歲出返嚟,都可以受歡迎。」

這段時間,她要同時兼顧家庭和工作。「嗰十幾廿年未停過,日頭拍完劇,夜晚趕去登台,搭夜車趕返屋企,仲要睇小朋友啲功課、簽手冊,4點幾5點訓,6點起身,然後睇佢哋食早餐、返學,係嗰段時間先見到佢哋。」縱使工作忙碌,家燕姐也會找不同方法與子女維繫關係。「每日寫紙仔,Call機留言,同埋趁放break(小休)打電話俾佢哋。」

她坦言,對子女心存虧欠。「我不能話自己係個十全十美嘅媽媽,但我覺得我盡力去做。我對佢哋有虧欠,因為我帶唔到一個好完整既家庭俾三個小朋友,呢件係好遺憾嘅事。但好無奈,婚姻係兩個人互相組合,而建立一個家庭。如果對方唔同你合作,你係無辦法做好這個組合。好彩佢哋明白事理,所以有時我嘅所作所為,唔能夠令佢哋覺得滿足,佢哋會體諒。」

她更難忘在工作最為忙碌的日子,孩子亦不忘為她慶祝母親節。「當時我根本冇時間同啲仔女慶祝,有一次返到屋企11點幾,三個仔女訓哂覺。當我去廁所洗面嘅時候,突然之間佢哋三個起咗身,拎住一個提子蛋糕仔,插咗一支蠟燭,走埋嚟同我講『媽咪,母親節快樂!』我見到個蛋糕,望住佢哋,好感動佢哋記得母親節,但難過嘅係自己無同啲仔女慶祝過。」

勉勵單親媽媽:唔好鑽牛角尖

作為單親媽媽,家燕姐認為,要時刻保持樂觀。「每一件事以積極樂觀的態度去面對,自然迎刃而解,冇嘢難到你。自己唔好走向牛角尖,當年你覺得呢個係我最愛嘅人,冇咗佢唔掂,其實唔係㗎,你冇左佢都掂,可能更加掂!唔好諗唔好嘅嘢,要搵返啲開心嘢諗吓。好彩有佢,唔係點會有三個仔女?雖然係艱苦嘅歷程,但如果冇呢個歷程,邊有而家嘅親情呢?佢哋又點會珍惜媽媽呢?凡事有因必有果,退一步開闊天空,你個人自然會樂觀很多。」