【籃球場愛情故事】打波好型吸引他！球員戀愛模式：行動多過把口

可能有女仔會覺得，男仔打波好型，其實女仔打波都好型，佢跑得好快，單刀打快攻，有膽又有驚喜，你以為佢唔入但最後又入到畀你睇，幾欣賞佢。

相識於籃球場的達Sir與美婷，至今交往15年，育有兩子。陪朋友睇波而認識他，第一個感覺只是：「無朋友講到咁靚仔。」後來她轉到他旗下的球隊，慢慢了解更多，才被雙方吸引。「由識到拍拖應該隔咗五年，佢最吸引我，應該係性格爽朗同簡單。」

「我諗咁多年嚟，我講『我愛你』嘅次數，三隻手指數得晒，表白、求婚、結婚。」在一程由內地回香港的火車上告白；人生唯一一次買花，就是求婚那天，在達Sir的生日會上，一眾隊友見證下，典型的紅玫瑰；還好美婷也是個不好花的人。

「本來我係打算喺自己場藍球比賽求婚，著住對印有『Marry Me』嘅鞋，著埋件印住『Marry Me』嘅衫，諗住中場休息求婚，點知上一場有人做咗同一件事，所以先變成生日會求婚。」

不過女孩們或多或少都愛聽「我愛你」，也有很多人受不了這麼「口硬」的另一半。然而這位聽來不解溫柔的人，卻又會堅持每日做浪漫的小事。結婚以來，每晚還是會有一個good night kiss。看似平凡，但能堅持七年以來做同一件小事的人又有多少。「我係一個唔識表達嘅人，工作上無問題，但感情上，愛情、親情上我真係唔識表達，我係行動多過把口。」訪問時談及那個晚安吻，忽然害羞，以類似whatapps馬嬲掩面的姿態說出。

「只要大家都認定對方，相處其實同拍拖時嘅感覺一樣，唔一定要講出口，大家都可以感受到。」兩人工作時間不同，她下班了，他還在教波，為見多幾面，她偶爾會等他回家，就為說上數句。他不善製造驚喜、又不會事事掛嘴邊，反是默默以行動說明。「佢都知我有時做嘢係做到凌晨兩、三點，佢會知道我係為大家而辛苦，而唔係為自己。」

孩子閒時由嫲嫲帶，假日由他們接手，一星期七日都全情投入家庭生活，要完全兩人獨處，只能秘密請假。「有時可能會特登、秘密地請半日假，同佢（達Sir）睇場戲，但都真係少。」坐在他旁的她，細語補充：「佢晏就又唔搵我食飯。」事實是他已盡量抽空，但或許對另一半，見再多也不會覺得夠。

從前的大家是兩人，孩子出世，大家成了四人。「拍拖同結婚最唔同，係多咗兩個小朋友，帶兩個小朋友出街就當係拍拖，少咗好多兩個人相處嘅時間。」以往，出街都是他牽她，現在是兩位兒子成了護花使者。「仔仔一見到我拖住媽媽，就要爭返嚟拖，咁爸爸唯有讓返媽媽出嚟。」雖敵不過這兩位「小情敵」，也是他樂見的，說明孩子們都黏她。

坦言現在一切以孩子為先的二人，孩子成了中心，關係中滲透了親情，看似不再純粹，卻是另一層的甜蜜。

首飾提供：周生生

《女生》總在你身邊，請立即下載《香港01》App