《一週的偶像》嚇到Rain叫罷拍　鄭亨敦：係佢養大BTS防彈少年團?

韓國靚女金泰熙，早前為老公雨神Rain誕下女兒，Rain仲喺《團結才能火》同《The Unit》節目中提過，女兒似媽媽擁有雙眼皮，睇嚟長大後都會繼承金泰熙嘅美貌！而Rain生女之後就密密做兼comeback搵奶粉錢，昨日播出的《Weekly Idol》（又譯：一週的偶像）Rain亦上去做嘉賓。

最近Kpop偶像上MBC綜藝《一週的偶像》除咗要挑戰2倍速之外，仲要挑戰成功先可以宣傳自己嘅新歌或者專輯，Rain一場嚟到梗係想好好宣傳。不過Rain早前同《一週的偶像》MC鄭亨敦去台灣拍攝《團結才能火》時，都有諗住趁機介紹一下新碟，但Rain就大爆喺另一節目《團結才能火》入面一句有關新碟嘅嘢都冇提過，搞到佢勁焦急！所以Rain今次喺《一週的偶像》，自我介紹時就不停想介紹新歌《GANG》，想不到就畀鄭亨敦同Defconn打斷，話之後會畀時間佢。Rain竟第一時間話：「我信唔過佢啊！」究竟Rain喺《團結才能火》有幾慘？真係一句宣傳新歌《GANG》都唔得？

之後Rain又講到對於《一週的偶像》印象最深係JYP Entertainment社長朴軫永嗰集，仲問道：「係咪真係一定要跳《Bad Girl Good Girl》，仲要瞓晒地咁跳呢？」要跳miss A呢首性感歌，講真一般男人又幾難接受嘅！而喺《一週的偶像》接近尾聲部份，鄭亨敦就要求Rain扮可愛唱一次「可愛頌」，並播出JYP朴軫永版本。Rain對於呢位前社長直言接受不了，仲話唔想再睇添啊！

不過最好笑都係《一週的偶像》鄭亨敦同Defconn死屈BTS防彈少年團都係托Rain嘅福先可以喺美國活動、「係Rain養大防彈少年團」、「Rain就係防彈少年團嘅爸爸」、「PSY如果唔係因為Rain都唔能夠活動」等，嚇到Rain即時灑手拎頭否認，仲用敬語問鄭亨敦：「點解要咁對我」、「咁樣仲點進行落去」，又即時對住鏡頭講：「各位，唔係咁㗎！啱啱所講嘅嘢同我完全冇關係，全部都係佢哋本人努力得出嘅成果」，最後Rain仲話：「我終於醒覺知道要避開亨敦哥！」真係望住個mon都忍唔住笑出聲啊！

之後《一週的偶像》仲準備咗Wanna One成員姜丹尼爾嘅摸大脾舞、SHINee泰民《MOVE》同埋宣美《Gashina》畀Rain睇完跟住跳！雖然Rain睇完之後都有即場跳，不過就不停畀鄭亨敦捉佢唔啱拍子，搞到Rain大叫話唔宣傳！唔發專輯！仲要提早收工返屋企添！好在鄭亨敦同Defconn為咗氹Rain落搭，都不停氹佢，又畀佢過關。最後Rain仲挑戰咗2倍速《Rainism》添，Cloud（Rain粉絲）一定要「儲存」啊！

Rain《可愛頌》

【The Unit】連Rain都被迷到！　李正河憑致命性傻笑合格

下載《香港01》App，更多韓星靚相、影片率先睇！

iOS：http://bit.ly/hk01app-iOS-download

Android：http://bit.ly/hk01app-Android-download

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/