【多圖】許冠傑譚詠麟計劃開Part2預埋阿Lam：要十幾場先滿足到！

一連12場《阿Sam & 阿Tam Happy Together》紅館騷，昨晚圓滿結束，兩位樂壇傅奇：68歲的「歌神」許冠傑與66歲的「樂壇校長」譚詠麟首度合作，跨半世的約會帶給樂迷難忘的晚上，而且玩得盡興，Encore到晚上11時45分先肯完；校長更希望可以再辦Part 2。

許冠傑的兩位兒子懷欣、懷谷唱拍住阿Sam阿Tam唱出《鬼馬雙星》、《愛情陷阱》、《半斤八兩》等金曲，連串快歌炒熱全場氣氛。許冠傑更背貼背彈結他，這個父子檔合作相當精彩。

許冠傑唱《紙船》叫樂迷亮起手機燈，營造12,000「紙船」的手機燈海，場面浪漫。校長又換上西裝又唱又跳，又與Dancer面貼面，舞台效果十足。然後兩人向已故歌手陳百強、張國榮致敬，唱出《一生何求》及《有誰共鳴》，雖然有些少甩碌，但氣氛一樣感動。

校長又講到對阿Sam的感覺：「初初識阿Sam比較難，佢係『忍者』，感覺較內向，搞到我都唔敢亂噏，不過後尾熟咗就發覺佢好幽默。」阿Sam講笑回應話：「好開心成為你嘅偶像，你又成為好多人偶像。令fans咁開心多謝你！今晚好難忘嘅一晚！」然後二人合唱《Try to Remember》及《浪子心聲》。

成個演唱會有幾精彩？睇圖就會知。(攝影：黃浩晉)

兩人回後台片刻換戰衣後很快再現舞台，無視超時，Encore唱到尾，樂手們都走到台上玩得非常投入。Fans踏地打拍子氣氛高漲，校長與阿Sam一口氣唱出《暴風女神Lorelei》、《天才與白痴》、《Meggie》，阿Sam話：「唔捨得所以繼續唱！要珍惜每一分每一秒！」校長又話：「字幕機彈咩出嚟就唱啦！」之後唱出《是雨是淚》、《阿朗戀曲》、《愛的替身》、《天才白癡夢》、《80歲後》，校長打趣話：「大家唔使趕地鐵咩，戒嚴呀！」

然後歌神與校長來個世紀攬攬，阿Sam話：「天下無不散之筵席」，最後唱出《鐵塔凌雲》為演唱會畫上完美句號，唱到晚上11時45分才完騷，校長話：「有期就再同大家見面！」

兩人到後台接受訪問時，阿Sam話未試過見到紅館觀眾反應如此熱烈，很高興令大家都盡興已回。校長又講到樂迷反應熱烈，頭兩場已拉傷手，睡覺時也覺得痛，要休息個多星期。被問到是否開part 2時，校長就表示要視乎檔期：「要有十幾場先滿足到需求。」又被問到會否舉行「阿Sam阿Tam同阿Lam」演唱會，校長則表示大家都很熟絡，但牽涉不同公司要再夾期。