【專訪】Shine開金口唱《十八相送》　變集體回憶全因當年商場騷

「摘去鮮花然後種出大廈，層層疊的進化……」Shine一曲《燕尾蝶》唱到街知巷聞，也標誌着80、90後的青蔥回憶，相信不少讀者今天再聽《十八相送》、《天又藍》、《祖與占》、《東涌日和》等等作品，腦海都會泛起以往的種種片段。
數數手指Shine已出道15年，天佑與又南都由「半成年」變成今日的大男孩，明年3月將會舉行15周年紅館演唱會，相信不少追隨多年的樂迷都滿心期待。不少人以為Shine在06年已拆夥，又有人覺得他們開騷是「短暫重組」，不過天佑與又南一句：「Shine永遠都喺到，我哋冇諗過拆夥呢樣嘢！」打破上述所有謎團。
攝影：陳順禎

天佑與又南早已有舉行15周年演唱會的構思，但種種原因令計劃膠着，不過深夜的一通電話令演唱會終於成事。天佑說：「好記得有一晚凌晨4點幾，我忍唔住打俾又南，佢竟然未瞓，我就話concert嘅事係時候要再傾，點知又南都話『其實我一早都想同你講呢樣嘢』，嗰一刻發現原來大家嘅諗法仲係一致㗎！」

雖然近年天佑與又南大部時間各有各忙，但默契仍在，就如Shine成為了大家的集體回憶，一直都在樂迷腦海。但若果沒有這股「回憶潮」，Shine會否在06年就此成為歷史？他們沒有想太多，天佑說：「回憶就冇得冇嘅，我哋都冇去諗任何嘢，集體回憶都唔係我哋自己講嘅。」

雖然天佑與又南有段時間專注各自工作，但默契仍在。（陳順禎攝）

Shine一直都沒有宣布過拆夥，但天佑與又南在06年開始各自有發展，難免令人有錯覺，又南都話：「有啲位係好尷尬，我哋冇同大家講過我哋想點樣，唔怪得有人會認為拆咗夥，其實我哋冇諗過要拆夥。」不過06年一個商場騷令天佑與又南都有一種「滑啞」的感覺，成為他們想專注各自的工作事的觸發點。

他們憶述：「當時一個商場騷宣傳緊《Shine On》呢隻碟，公司問我哋會唔會彈結他，我哋話『彈囉』；又問會唔會唱埋和音，我哋答『唱囉』；再問不如播MMM墊底你哋再唱啦，我哋話『好啦』。就係嗰一日就發現點解大家做嘢冇晒衝勁，冇晒感覺，好似去到一個樽頸位咁。」

雖然演出去到樽頸位，但Shine的兄弟情沒有變，又南話：「不過我哋兩個兄弟嗰種友誼係冇變，唔係因為私人事，只係因為上到台表演好似俾唔到火花大家咁。」

天佑與又南專注各自工作好一段時間，不論幕前幕後都有參與，豐富了閱歷再聚頭找到新的火花，到12年黃偉文作品展外界反應非常好，再到十周年演唱會，令Shine「重組」。

提到詞人黃偉文，Shine視他為恩師：「Wyman絕對係我哋嘅恩師，一來我哋有8成嘅歌都係佢填詞，最感動係到今次演唱會有新歌想邀請Wyman填詞，佢一口應承話『呢兩隻仔睇住佢哋長大嘅，一齊去啦！』我聽到之後真係眼有淚光，真係好感動，因為呢樣嘢唔係理所當然佢一定要做嘅嘢，佢真係好撐我哋！」

Shine入行15年經歷過不同高低起跌，他們亦慶幸有很多前輩提攜，講過很多鼓勵的說話，即使是微小的事情他們也印象深刻，這些片段對亦啟發了他們，所以天佑與又南將15周年演唱會的主題定名為《Moment》，希望樂迷分享這些珍貴的時刻。

聽完《十八相送》覺得唔夠喉？記得睇埋下一篇報道，Shine會唱《天又藍》之餘仲會回應網民mean comment，大家切勿錯過！

場地：Show Bros Rental Ltd
Hair: Louis Tse @Number 8 Hair Salon
Make up: Henry Tse @BigCstyling
Wardrobe: 

又南: all form Kent & Curwen 
天佑: shirt from scotch &soda ,sweater from Kent & Curwen, jeans from American eagle outfitters