【獨自音樂】Robynn & Kendy翻唱成績好過原創？ 「我哋唔介意」
「小清新」音樂向來給人一種「易入口」的感覺。不論在你失眠時、遊車河時、甚至是你下班或放假時收聽，都可以讓你暫時遠離繁囂。不知道Robynn & Kendy的作品可曾有給你4分鐘放下心頭大石之感呢？初出道時就有「小清新」組合之稱的Robynn & Kendy，因翻唱經典作品在網絡上得到不少人的關注。出道後更到內地選秀節目《中國好聲音》第三季，憑着翻唱《思念是一種病》而得到更多人認同。不過隨後因種種原因她們在樂壇消失1年，今年她們終於重新出發。今次Robynn & Kendy為你翻唱出莫文蔚的《The Way You Make Me Feel》及新歌《無敵》。
攝影：江智騫
「小清新」唱作組合Robynn & Kendy於2012年出道，曾推出多張大碟的她們，當時以兩枝結他配上兩把甜美而有辨識度的聲線得到不少樂迷認同。參加內地節目《中國好聲音》後，更令她們聲名大噪，推出國語大碟。不過在她們最令人有印象的時候卻在宣布休息，而且由3個月變為1年。正當大家快要忘記她們的音樂之時她們再次重新出發，推出多首有別她們以往「小清新」風格的作品（如：《負攝石》、《無敵》、《Shout n' Cry》及《急救中》），究竟她們發生了什麼事情呢？
「我哋靜咗1年時間，經歷一個沉寂期。到我哋今年重新出發，好想畀大家睇到我哋有進步嘅一面。原本係想休息3個月，但因為人事變動，公司唔夠人，無人想接手Robynn & Kendy，公司希望我哋為自己重新定立音樂上嘅方向。其實我哋老闆（環球唱片高層Duncan）係一個好有人情味嘅人，佢有為我哋而擔心，所以先想我哋計劃好啲，就這樣休息了1年。」Robynn & Kendy說。
提到曲風改變，她們並不認為是隨波逐流，反而是踏出成長的第一步，「我哋有聽到人話『點解出隻咁嘅歌』、『做咩你哋要180度轉變』？其實大家仔細聽，會聽得出有好多R & K嘅元素喺入面。過去我哋都有嘗試用唔同方式表達我哋嘅音樂，不過外間通常只將焦點放喺主打歌或者最多點撃嘅作品上。其實我哋會成長，我哋唔能夠一直停留，我哋有需要用多啲新方式呈現自己嘅想法。無論大眾接受與否，我都覺得我哋係要突破。」Kendy說。
Robynn續說：「我同Kendy都有同一樣嘅感受。我唔想Robynn & Kendy畀人感覺係嚟嚟去去都係嗰啲嘢。我哋想話畀人聽『We are so much more than what do you think we are！』」
如果你有留意作品《負攝石》的話，你會感受到Robynn & Kendy在歌曲中表達出迷惘、等待、對前路不知所措的情緒。當一對組合遇到這種瓶頸期時，難免會有「放棄」、「單飛」的想法。Robynn & Kendy也不例外，「係有曾經諗過。我哋係有諗過自己咁辛苦為乜，何必要自己唔開心。但係後來我又會諗，其實每一代嘅歌手都會經歷浮沉期，就好似好朋友阿Phil（林奕匡）咁。但當我哋見到佢哋開始愈做愈好，我都會諗其實我哋都可以。我覺得低潮係每一位歌手必經階段。唔可能事事順利。」
Robynn續說：「我哋寫緊《負攝石》嘅時候，Robynn & Kendy處於唔知幾時會出碟，唔知幾時有嘢做，睇唔到前路嘅迷惘期。亦因為咁所以喺無界線嘅情況下寫呢首歌。」
Robynn & Kendy翻唱天后莫文蔚的《The Way You Make Me Feel》，為你寂寞的晚上帶來「小清新」。
回想起2011年，Robynn & Kendy因為在網上唱出多首翻唱作品而得到大家關注，支持她們出道成為歌手。但當她們推出原創作品時，集中點往往都是她們的翻唱歌上。Kendy表示：「有人會問，點解我哋啲cover歌會比原創歌更多人留意，我覺得係個timing幫咗我哋，當時多人聽。其實cover歌都係我哋兩個好重要嘅一部分，我哋係一定唔會摒棄。但係我希望可以喺呢兩樣嘢入面搵到平衡點，所以我並唔介意其他人話我哋嘅翻唱歌比較多人聽，因為我們清楚自己嘅目標。」
在音樂路停滯1年的Robynn & Kendy，在今年除了推出多首新歌外，更在年尾將有首次賣票的音樂會：「我哋將會喺伊利沙伯體育館舉行首個大型音樂會，今次主題係《Reflection》，希望透過今次嘅音樂會同樂迷回顧過去5年Robynn & Kendy嘅音樂路。過去5年最令我哋難忘嘅係我哋初初唱cover嘅時間。嗰段時間由拍片擺上網，到錄音以致剪接都係自己做，我覺得當是係最開心最自由。」Robynn憶道。