【專訪】鄧月平轉做歌手 未搣甩「巨胸翠如」:鬼叫自己唔紅咩

撰文:黃浩晉
出版:更新:

鄧月平在普遍觀眾心目中第一個印象就是「巨胸翠如」,由入行前到參與選美節目,再到參與電影拍攝,她的身材一直都成為焦點。雖然鄧月平在幕前的形象深入民心,但她卻以「年尾壓軸新人」的姿態進軍樂壇。入行一年就作多方面嘗試,是否為了搣甩花名?

對於「巨胸翠如」四個字,鄧月平視之為動力:「證明一日未改名,鄧月平你一日都要努力啲,改完名之後要更加努力!如果唔係你會變番『巨胸翠如』呀!」

攝影:陳順禎

鄧月平覺得要更努力,才能令觀眾不再稱她作「巨胸翠如」。(陳順禎攝)
以「男友視角」認識一下鄧月平(陳順禎攝)
+1

何事「踩過界」由演員變歌手?

可能有人會好奇,為何鄧月平好端端會加入樂壇?原來她對音樂的興趣早在中學開始。鄧月平表示:「中學試過走去busking,本身係搲歌唱,後來就變成長駐。」初加入公司時,鄧月平都試過向公司提到可以幫手寫Demo,到今日終於有自己歌,她多謝公司送她一份禮物,亦感激身邊有很多前輩提攜。

原來鄧月平細細個就已經鍾意唱歌,更曾自薦想做歌手。(陳順禎攝)

《女神經》原來係「女神兵」?

鄧月平是不少男士的女神,何以會出歌話自己是「女神經」?鄧月平笑說:「公司覺得我個形象好似『女神經』,好似精神分裂咁,想法成日飛嚟飛去,哈哈!」聽到這句身旁經理人面有難色苦笑。傻笑一輪鄧月平忽然一本正經說:「其實首歌係講每一個女仔都係女神經,而MV入面就用甜品去比喻女仔尋找愛情嘅過程,嘗試各種味道去尋找合適自己的愛情。」咁快轉到channel果然係「女神經」!

不過唔講唔知,原來鄧月平都試過「當兵」,更將經歷放進歌詞,她提到:「其實歌詞暗藏自己一段少女心事嘅經歷,我中學時候體育好勁有個花名叫『馬騮』,但係為咗一個迎合暗戀嘅男仔就刻意做到好文靜,但最後都係俾人friend zone埋。所以歌詞入面『誰來真心喜愛我 通知我 不要拖』同『專心把我 研究得清楚』係我嘅心聲,希望對方唔好玩泥沙。」

聽到鄧月平曾經「當兵」,相信很多人都O晒嘴。(陳順禎攝)

「冇一個女仔鍾意俾人標籤」

今時今日「視覺影響聽覺」、「用眼球聽歌」是常識吧,加上鄧月平有被外界稱作「巨胸翠如」,她會否擔心過大眾只留意她的身材而蓋過她的努力?鄧月平豁達說:「所以我就努力做戲,努力唱歌令大家覺得我唔係『巨胸翠如』。」她又笑言:「鬼叫自己唔紅咩,紅啲人哋咪唔會咁講囉,哈哈!」

雖然鄧月平經常嘻嘻哈哈,但她也有一聲心底話:「冇一個女仔希望俾人標籤,無論靚女又好,平凡又好;身材突出又好,身材唔好又好;都唔希望俾人標籤。」即使外界很多談論聲音,但鄧月平也樂觀面對:「證明一日未改名,鄧月平你一日都要努力啲,改完名之後要更加努力!如果唔係你會變番『巨胸翠如』呀!」

鄧月平表示沒有女生希望被標籤,唯有更努力讓大家認識自己。(陳順禎攝)

做「年尾壓軸新人」壓力大?

鄧月平年尾才派歌做新人,會否因為要出成績而給予自己很大壓力?她卻自嘲:「我不嬲都冇乜攞獎運,自己努力咗先啦!哈哈!」不過她透露原來錄音時候才是最大壓力:「當時前後錄咗十幾個鐘,加上填詞人好勁,唔想整臭人哋個名所以迫自己要唱到最好,嗰陣仲錄到喊!」幸好身邊的工作人員對鄧月平照顧有加,除了安撫她的情緒,監製更逐句向她解釋歌詞,如何控制聲線,最後《女神經》才能面世。

 

場地提供:White Button Cafe & Dessert

雖然鄧月平自嘲沒有攞獎運,不過會繼續努力造歌。(陳順禎攝)
鄧月平係「女神經」?你又點睇先?(陳順禎攝)
+4