《降魔的》不如開埋音樂劇啦！　蔣志光胡鴻鈞首次合唱聽到心心眼

今時今日仲有幾多人知道蔣志光除咗係TVB入面嘅性格演員，其實佢仲係一個實力派歌手？

《降魔的》中的「石敢當」胡鴻鈞及「莫有為」蔣志光合唱片尾曲《遙不可及》，編曲只有一支木結他伴奏，留有很大空間突顯兩人聲線，讓大家聽真胡、蔣二人歌聲的特質。

胡鴻鈞獨唱的版本之前大家晚晚都聽過，今次加入蔣志光獻聲令大家耳目一新，一首歌可以聽到兩把靚聲演繹實在機會難得。雖然有人會覺得蔣志光咬字用力、震音較多，唱腔有點old school，但不能否認他發聲很穩定、有穿透力，大家看一次就明白為何要唱得好要「擘大個口」。加上蔣志光與胡鴻鈞聲線一重一柔，聲線很搭配，歌中和音的部份非常出色。

蔣志光唱過《相逢何必曾相識》、《皇后大道東》、《舊朋友》等等大家耳熟能詳的歌曲，而且又是本地80年代電子樂隊Raidas的「影子成員」，單單是以上的「歷履表」都夠架勢堂。不過大家較有印象都是他在TVB劇集中飾演的諧星角色，數最近期是《降魔的》的莫有為，還有《老表，你好hea》中的高音等等。而胡鴻鈞今年勢頭強勁，憑「石敢當」一角令大家再次留意到他歌唱的實力，更躋身叱咤我最喜愛男歌手五強。

胡鴻鈞接受《香港01》訪問時表示，促成這次合作全因一次《降魔的》宣傳活動：「有一次宣傳活動上面，蔣老師問可唔可以攞《遙不可及》嘅MMO（伴唱聲帶），我當時好開心證明佢真係有聽同埋鍾意呢首歌，所以我就問可唔可以同佢合唱拍條片放上網。」

那與前輩合作會否很大壓力？胡鴻鈞大讚對方沒有架子：「咁又冇喎，因為蔣老師一嚟到就同我講笑，又冇架子。加上之前拍劇都有交流過，已經有默契。」

兩人第一次合作，胡鴻鈞落足心機準備，就連蔣志光都有讚：「我事前都做晒功課，和音部份都有專登去度，拍片連錄音都係4小時內完成。大家都係Live Take咁去錄，錄咗2、3次揀最好嗰次去用，希望保留一種比較raw嘅感覺。」

難得有機會合作，胡鴻鈞有否藉此取經？他說：「都有呀，始終於前輩歌手嘅唱法同我哋唔同，因為佢哋以前錄音好追求一take過，聲線都比較響亮厚實；而我嘅唱法同聲線都係偏向輕柔啲，所以大家今次都會聽得到個分別。」

胡鴻鈞今年勢頭強勁，入選叱咤我最喜愛男歌手5強，他感謝大家的支持並希望來年可以專心音樂上的發展：「其實我短期目標反而重視出年歌曲上製作，希望出年嘅歌可以承接到今年個勢，我都有同公司表達過自己想多啲做歌嘅意願，所以拍劇方面就會放慢腳步，公司都好配合。」