黃子華開金口Rap金句　拍住古巨基唱《子華說》超洗腦

「係咁㗎啦，好出奇啊？」、「搵食啫，犯法呀，我想㗎？」、「老闆出俾你果份唔係糧，係賠償」大家睇到呢幾句係咪即刻有聲先？

以上都係出自黃子華嘅金句，有名你叫「子華神」當然字字珠璣，一句就篤中你笑穴。淨係聽子華神齋講都夠晒過癮，如果佢Rap埋出嚟你又點睇先？古巨基今日推出新歌《子華說》，除了邀請到子華神開金口，基仔當然有唱埋一份，真係一首歌滿足晒你兩個願望。

子華神嘅金句涵蓋各種題材，打工仔心聲、港男港女愛情觀、苦中作樂人生觀樣樣齊，所以今次《子華說》節錄咗上述各方面金句拼湊而成，每個段落主題鮮明，大家聽起上嚟都易跟好多。加上《子華說》編曲非常groovy，切合子華神棟篤搞笑的風格，鼓beat同結他部份唔複雜，但節奏非常catchy一聽就上腦。

真係夠膽講句，各位fans們去唱K歌詞都唔使聽，一起音樂就可以唱晒成首。如果到時基仔開騷請埋子華神上台合唱就好喇！