【專訪】鄧健泓自爆曾失聲：用好長時間去重新學唱歌
自2010年開始淡出歌手身份，轉型為愛妻石詠莉打造發燒碟，幾年的用心經營，鄧健泓(Patrick)開始踏入收獲期。今年他重拾歌手身份，將於麥花臣場館舉行《阿泓》演唱會，更乘勢推出新歌《那年某日》，向美好的回憶致敬。
攝影：陳順禎
髮型：Euling Chow @ IL COLPO TST
場地：香港九龍貝爾特酒店
關於《那年某日》
鄧健泓自2010年後沒再推出個人作品，今次為配合演唱會宣傳推出《那年某日》，原來此曲一早已存在，只是一早在等待面世的機會。《那年某日》的故事，是來自一齣舞台劇，Patrick憶述：「呢首歌其實喺2017年頭已經寫好，當時內地有套舞台劇係講關於回憶嘅，於是為個劇寫好呢首歌，當時都未叫《那年某日》，而係《快樂時代》。點知套舞台劇最後告吹，首歌就擺咗喺度，後來計劃好會有今次嘅演唱會，於是就將舊版《快樂時代》再改，變成而家嘅《那年某日》。」
原來阿泓係運動健將
《那年某日》的MV中，Patrick邀請了六位藝人好友出鏡，更各自帶來了私人物品分享故事。麥包帶來了他親生兄弟生前經常與他玩的遊戲機；蓋世寶帶來了陪伴她多年的毛公仔；譚玉瑛姐姐拿出一本日記簿，回憶文字帶給她的美好；蔣志光帶來了一部walkman，代表著以前音樂的每一步也需要時間用心經營；孫耀威手持著《龍虎門》figure，訴說年輕時大家的衝勁和魄力；而鄭敬基則帶來一部原子粒收音機，雖然已是半世紀前的產物，但仍然有他的作用。
偏偏MV中，Patrick卻沒有拿出他的「寶物」與大家分享，訪問當日問到他：「到底鄧健泓心底裡的寶物會是什麼？」他先是想了一想，再道：「應該會係釘鞋。我以前運動好叻，跳遠跳高所向披靡，成日都代表學校出賽，嗰種感覺好青春。灣仔田徑運動場我都留過唔少腳毛，所以之前話要拆，我都有少少唔開心。」不過一次意外，足以令Patrick被逼放棄運動，他憶述：「中學時代，我代表自己學校聖三一堂參加運動會，攞好多獎。直到我去加拿大讀書，我都keep住對田徑嘅熱誠，有一年，我要代表Edmonton(愛民頓) 呢個地方出席省份賽事。好可惜，其中一次練習跳遠，我一跳，就feel到『啪』一聲，然後右邊大腿Hamstring就咁斷咗，最後我堅持要出賽，換咗起跳腳成績當然唔好啦，之後做咗好多物理治療，諗住會好返啦。」帶著康復的雙腿回到香港，開始主持兒童節目生涯，才令Patrick真正明白到，有些事情失去了，便真的失去了：「有一日同李天翔拍一首兒歌MV，內容係關於做運動，我同佢講我可以原地跳高單手拉住籃球框，佢話唔信。之後我即場試畀佢睇，點知連網底都撈唔到，我先發現原來我真係失去咗自己嘅彈跳力。」
重新找回聲音
對於一位運動員來說，失去彈跳力大概就等於失去一切，難以重新振作。對於作為歌手的鄧健泓來說，失去原有聲音的打擊則是更大。Patrick坦言：「我記得2004年去完北海道返香港，發覺自己冇咗一啲音，唔知點解，照過聲帶各方面都冇問題，但係偏偏高音少少已經唱唔到，一路都搵唔到原因，於是用好多年時間再訓練自己嘅唱歌方法，令自己重新上軌道。」提起失去聲音一事，Patrick顯得失落：「當時個人係好沉，個打擊大到好似一隻老虎冇咗牙，大家喜歡我嘅聲音，但偏偏我就失去咗，咁點生存呢？嘗試過搵當中嘅原因，可能係北海道、可能係後生唱歌方法錯，一味嗌，最後都係百思不得其解。變相一直去逃避呢個問題，避開唱高音，每次唱歌都過唔到個心理關口，成日形住形住自己唱唔到，喺香港又面對唱片公司同其他問題，好多嘢加埋令到我百上加斤。結果我用咗好多年時間，重新學一個唱歌方法，慢慢搵返自己嘅聲音。」
除咗釘鞋，其實Patrick仲珍藏咗好多自己嘅手稿，全部都係以前作曲作詞、甚至係MV度分鏡嘅時候留低
叮噹可否不要老？
出身自兒童節目《閃電傳真機》的Patrick，對兒童節目及兒歌抱有獨特情懷。比起《味分高下》、《勁歌金曲》、《衝上雲霄》、《飛虎》當中的演出，大家可能對《閃電傳真機》中的Patrick哥哥更有印象。Patrick想起當年往事，嘴角總是帶著微笑：「兒歌特別對我有meaning，我第一首見街嘅就係兒歌，《童真夢》，由錄音到拍MV，再喺兒歌節目播，我仲記得好清楚。其實當時我已經開始寫好多歌，《踏上高峰》、《FRIENDS》，當時每件作品都令我好開心，其實大家心目中都應該有自己喜歡嘅兒歌，因為大家點都會有一啲快樂無憂嘅記憶。」
提起兒童節目，鄧健泓有一件特別自豪的事情，還記得當年《閃電傳真機》有一個環節叫《芝士學堂》，一眾兒童節目主持也會飾演「吱吱鼠」，Patrick表示這個環節特別應該要重現在電視機當中：「我最鐘意呢個角色，鐘意到我曾經試過因為呢個角色去挑戰譚玉瑛姐姐。留學嘅時候我養過好多倉鼠，佢哋所有嘅動靜我都瞭如指掌，例如點抹身、點抹鬚、點聞味道，整個生態我都好熟識。於是第一日做《芝士學堂》，見到譚玉瑛姐姐做「吱吱鼠」，原來隻手擺錯咗，佢將隻手放平，但其實老鼠點會將隻手放平？老鼠應該係將隻手向下，手指緊閉。於是我直接同佢講，而且其他主持做「吱吱鼠」，佢哋只會講嘢前後加「吱吱」呢啲詞語，但我會做得更仔細，加上一啲郁下個鼻、隻手抹下鬚、聽聽下書又會搲痕。結果影響咗其他主持都一齊咁做，所以我會為呢個角色加咗好多自己獨有嘅元素落去，例如你會見到Patrick鼠係特別惡。」