鄭伊健任古巨基尾場嘉賓 　兩個大男人台上「逗一逗」係咩玩法？

古巨基昨晚於紅館舉行《WE我們世界巡迴演唱會—香港站特別版》尾場，闊別紅館年台7年，基仔為歌迷送上驚喜連連。除了邀請到「浩南哥」鄭伊健擔任嘉賓，基仔更唱到唔捨得走，超時送上「真Encore」唱足成首《勁歌金曲》，玩到晚上11時50分先完場。
攝影：黃國立

雖然基仔日前發生墜窿意外，但無礙演出依舊唱得跳得，他更自嘲「今次跌一跌，唱歌、跳舞都好咗」。而且這次意外更衍生出，一段古太與他的窩心經歷。基仔說：「嗰時受傷入院檢查，個屁股有啲痛唔知係咪瘀咗，咁我就拉低半邊褲古太睇睇。點知古太睇完講一句『瘀就冇瘀，不過好多橙皮紋囉』……」基仔未講完台下已經拱堂大笑，他續說：「我心諗，幾想一個屁股頂埋去。不過好開心，有一個喺呢個時候仲會講笑o氹下自己嘅老婆。所以我依家，係一個好鍾意返屋企嘅男人嚟㗎！」基仔台上講得甜絲絲，台下歌迷當然都聽到好冧，然後唱出《愛回家》。

基仔展示完「愛妻號」一面後，請出多年兄弟鄭伊健出場，二人合唱《一個為你甘去蹈火海的人》，基仔搞笑話：「我哋要再度重生，激烈擁吻呀！」之後兩人肉緊攬攬兼話當年。然後台上播出當時他們拍攝《笑看風雲》的合照，基仔問伊健：「點解當年你要扯住我下面，仲要好大力好大抽咁揸，係咩意思？呢個係星爺嘅『揸乜龍抓手』喎！哈哈！」伊健就答：「因為當時Benz扯甩咗你條褲，所以我就幫你『逗一逗』，你唔記得咗呀？哈哈！」之後二人玩「當年今日」，影多張「逗一逗」合照。

如果睇足幾晚的歌迷都知道，基仔於encore位有一套鮮紅色，由80對波組成的「高達feel」戰衣，有網民曾抽水指這是「龍蝦裝」，基仔在台上發揮搞笑本色「反擊」網民，他說：「嗱，唔好再話我呢個係『龍蝦裝』呀，我嬲嬲豬㗎！同埋龍蝦係『嗰位』嘅太太，佢個龍蝦裝渣好多，我好過佢十萬倍啦下嘛！」

到演唱會尾聲，基仔唱出《愛與誠》、《友共情》、以及由《任天堂流淚》、《眼睛不能沒眼淚》、《重覆犯錯》等經典作品組成的medley，到晚上11時半，全場關燈亦有觀眾陸續離場，豈料基仔驚喜現身玩「真Encore」，他說：「7年冇返嚟開我點捨得走呀！」接着清唱出很多網民點唱的《逆時光》。基仔又話：「如果去唱K，最尾一定係唱《勁歌金曲》啦！我俾埋條聲帶你哋呀！」全場歌迷立刻為之瘋狂，尖叫聲連連，基仔亦好識做通場跑，趁最後機會去歌迷近距離見面，整個演唱會到晚上11時50分圓滿結束。

不過演唱會尾段發生一段小插曲，懸掛在天花的布幕機關失靈，其中一邊卡在半空，而另一邊亦稍稍阻擋了準備升高的舞台。地面與半空都出動大批工作人員，更有工作人員徒步走到天花位置的支架，人手收回布幕，過期間支架一直晃動，相當「牙煙」。