【專訪】神曲《一生所愛》仲有得改 盧冠廷：再做流嘢對自己唔住
盧冠廷(人稱LoLo)可謂香港樂壇的傳奇人物，縱橫樂壇三十多年，筆下寫過金曲無數。於90年代淡出，至2015年重出江湖，LoLo如俠客一樣，隱居閉關過後，再出手定一鳴驚人。今年LoLo炮製新專輯《Movie To Music》，從以往寫下的過百齣電影配樂之中，挑選十首重新改編，歌曲同樣以電影感為主軸，但用上不同風格詮釋，突破樂迷的想像空間。
在一片「冇歌好聽」、「我鍾意聽K-Pop」的聲音之中，LoLo卻要反其道而行：「年紀已經有番咁上下，唔可以再做啲『流嘢』出嚟，唔單止對自己唔住，更加對樂迷唔住！」
攝影：江智騫
留喺Comfort Zone對呢個世界冇好處
藝術家總會覺得作品永遠沒有完美，總會找到自己的不足，LoLo亦如是，所以才會有新專輯《Movie To Music》出現。他說：「我想超越自己呀，以前做過嘅嘢我唔想再repeat呀！呢個係comfort zone嚟㗎嘛，你做到之後仲要repeat即係留喺comfort zone，你冇進步到，對呢個世界，對自己都冇好處嘅！」
「你要不停接受新嘅挑戰，係難呀，咁你咪解決問題囉，世界上係冇嘢解決唔到！」
打破以往框框有妙計
《Movie To Music》中的歌曲由以往電影配樂改編而成，雖說那些配樂能夠提供靈感，但始終於印象根深蒂固，要破舊立新談何容易？不過LoLo卻說：「好容易抹甩呢啲框框㗎咋！」並舉《監獄風雲》主題曲—《充滿希望》為例。(原唱為肥媽Maria Cordero)
LoLo解釋：「雖然當時個編曲都我係做，但係邊個可以有肥媽個巨肺嗌到咁吖？冇㗎嘛，咁我咪要諗計囉！雖然我唱唔到佢嗰種爆炸力，但係佢嗌嗰part，我就用我嘅技術，用人聲扮樂器，嗰種震撼力一樣好大。首歌個層次由好靜，慢慢到鼓去bulid up，到我voicing出現，再到蘇德華最尾出嚟彈嘅結他，簡直係神來之筆，我只可以講係無懈可擊！」
「進化版」《充滿希望》套番落《監獄風雲》嘅場口一樣match！唔信嘅你聽下就明。
終極版《一生所愛》歡迎大家「挑機」
「苦海/翻起愛恨/在世間/難逃避命運……」《一生所愛》出自《大話西遊之仙履奇緣》，當年的非主打作品，如今卻紅足幾十年，亦曾被翻唱無數次，就連LoLo自己也改編再改編，他形容今次是「終極版」：「我覺得呢個編曲真係無懈可擊，因為佢唔複雜，一個結他，一個Cello，一個女高音，一部電鋼琴係咁多；依家你聽落去，個感覺真係好似我同一個仙女對唱一樣。」
他續說：「你唔會想像到可以出一個咁嘅版本，淨係個intro一段吟唱部份，都好有《西遊記》，古代魔幻片嘅感覺。所以我覺得係好難超越呢個編曲，我成日挑戰出面，因為有好多翻版嘛，請做一個比呢個編曲更有感染力嘅，我都想聽下，哈哈！」
將「終極版」《一生所愛》放番落呢個經典場口，有冇帶俾你另一番體會呢？
這個「終極版」背後，其實也有一段趣事，LoLo說：「唱片公司話唔可以唔擺《一生所愛》，因為太經典喇！佢話『你喺屋企彈就得㗎喇』，demo又好點都好，一定要有。咁我咪喺屋企彈囉，你哋依家聽緊呢個就係搵個cheap咪嚟錄㗎咋。」歌曲中的「仙女」是新晉女高音Alison Lau，由於樂器與人聲的音域配合也有限制，經過幾次反覆磨合，終於成就了無懈可擊的《一生所愛》。
年紀有番咁上下，唔可以再做「流嘢」
LoLo縱橫樂壇多年可謂長青樹，他堅持繼續創作原因很簡單：「自己年紀已經有番咁上下，唔可以再做啲流嘢出嚟，對自己唔住，對樂迷唔住！」他續說：「好多人留喺comfort zone就算，搵到樣嘢見到賣得喎，搞掂就去收錢，咁咪冇進步囉。」
正如2015年LoLo復出，推出《Beyond Imagination》專輯，顛覆多數經典作品，其魄力實在令人佩服，他說：「其實我都擔心㗎，好似我啱啱出番嚟嗰陣，頭一隻做得咁好，下一隻點搞呢？到依家希望下一隻又可以超越自己，我只可以講希望，因為今次已經可以去到一個好高嘅水平。」
想知道更多LoLo老師如何處理流行曲與電影配樂嘅心得，記得睇埋另外兩篇報道喇！