【有片】張敬軒關智斌紅館激罕同台合唱　網友：現場尖叫聲如核爆

香港歌手嘅演唱會，九成以上都會邀請嘉賓，有啲鐵腳出現時觀眾會開心但無太大驚喜，張敬軒演唱會第四場嘅嘉賓，就成功令大家又驚又喜，就係相識十年以上嘅好朋友Boy'z﹗佢地一出場同軒仔合唱《死性不改》，全場歡呼狂叫大聲到，連關智斌（Kenny）唱緊乜都聽唔到，有網友就笑言：「紅館震到好似核爆咁。」

軒仔同Kenny呢對好朋友，由出道起就不時被湊成一對，大家對呢Pair HEHE密友都相當受落，不過前年傳出佢地各有各忙漸行漸遠。軒仔演唱會第四場，請來Boy'z做嘉賓，見到Kenny同軒仔合體，大家又點可能唔驚喜呢。唱到《死性不改》中段讀白，三位百厭星大改台詞，先係Steven問：「點解要咁啫？」繼而望向Kenny:「點解你會嚟做嘉賓嘅？」Kenny就大聲答：「我鐘意呀，你吹呀？」又再次令觀眾狂叫。

由Boy'z升上台一刻觀眾嘅尖叫聲就未停過，軒仔都忍唔住反問觀眾：「我都唔知你地叫乜！」軒仔對住Steven話：「嘩，你講野佢地都叫到咁。」轉身一指Kenny：「咁佢講野.........」又再引來觀眾狂叫，叫聲猶如現場睇世界盃入球。軒仔笑住話：「知唔知咩叫無敵嘅嘉賓呀......」Steven即時翻抄一句指住Kenny 「知唔知咩叫無敵嘅嘉賓呀？」又再一次引爆觀眾狂叫，Kenny這時大方企過軒仔到，仲用手攬住好朋友：「咩驚你？我企到咁都重得呀。」令觀眾拍爛手掌。

軒仔表示自己最初入行時已經同Boy'z成為好朋友：「既然咁耐冇見，有D私人恩怨想係到解決下，我聽講網上有人寫左個故仔，話你地兩個為左我係salon 打交，究竟係咪真？」Kenny就即時搶答話：「你諗多左啦張生！我地兩個成日打交架！每次打完交Mani就會打來話，打還打唔好打面嘛！話晒靠個樣搵食。」同一時間軒仔留意到Steven坐埋一邊唔出聲，問佢做咩，Steven笑言：「我見你地咁耐冇見，比你講埋先囉！」觀眾狂拍手狂叫中，軒仔抵不住被他串，笑話：「你又知我地好耐冇見？」攪到觀眾不禁大叫:「嘴佢！嘴佢！」