許冠傑譚詠麟唱足3個半鐘無懼超時:希望大家樂觀積極、珍惜

撰文:黃浩晉
出版:更新:

許冠傑與譚詠麟兩位歌神再度合體,昨晚於紅館舉行《阿Sam & 阿Tam Happy Together Part 2 演唱會》。事隔一年開騷,二人唱出Part 1未唱的經典金曲,又不斷走到觀眾席與歌迷握手,難怪全場氣氛一直高漲,令Sam & Tam無懼超時唱足3個半鐘,近凌晨12點先完場。
攝影:梁碧玲

Sam & Tam的金曲加埋可以唱足3日3夜一點都不誇張,所以籌備歌單也有點難度,不過他們非常識做,盡量滿足不同年齡層的樂迷。演唱會中段,有一part中式小調環節,二人合唱《一水隔天涯》、《啼笑姻緣》、《紙船》、《水中花》、《世事如棋》等歌曲,還邀請到頂尖的二胡、古箏、笛子樂手同台演出。

+39
Sam & Tam唱足3個半無懼超時,非常識做冧歌迷。 (梁碧玲攝)

到Sam的個人環節,延續他一貫鬼馬抵死的風格,連串快歌《Pretty Woman》、《日本娃娃》、《瑪莉我好鍾意你》、《十個女仔》、《跟佢做個Friend》等等。已69歲的歌神阿Sam又唱又跳通場走,兼夾有氣冇甩Beat,實在令人佩服。到阿Tam出場,聯同許懷欣、許懷谷合唱《捕風的漢子》、《風中趕路人》、《夏日寒風》等歌曲,許懷欣提着電結他彈Solo非常搶鏡。

Sam & Tam加埋百幾歲,仲可以通場走又唱又跳,這份魄力實在令人佩服。 (梁碧玲攝)

Sam & Tam的金曲多不勝數,有些更可謂「大眾校歌」,有《鐵塔凌云》、《愛在深秋》、《愛的替身》、《暴風女神》、《浪子心聲》,全都是大家耳熟能詳的旋律,難怪校長高呼:「嚟喇喂!K房時間喇喂!」全場開手機燈,自動波大合唱,場面相當浪漫。

他們向觀眾感性說:「我哋都係屋邨長大,同大家香港人一樣,見證住香港經過6、70嘅奮鬥,由小漁港變成大都會。希望大家珍惜香港呢個福地,珍惜眼前人,用積極樂觀嘅態度面對人生!絕對相信各行各業嘅香港人,都可以不屈不朽,一齊努力!」然後唱出《珍惜》、《最佳拍檔》等歌曲為演唱會劃上句號。

Sam & Tam寄語大家:「希望大家珍惜香港呢個福地,珍惜眼前人,用積極樂觀嘅態度面對人生!」 (梁碧玲攝)