搞老人歌唱比賽防止獨居問題 明歌知欽：唔想佢哋再做隱蔽長者
「做音樂不忘初心」、「希望自己的音樂能為世界帶點改變」，這些幾乎一式一樣的對白不時出現在音樂人口中，但到底有多少人有真正實踐，又有多少人只是以大義之辭追求名利？由兩位「中佬」林建欽(Paul)和黃錦明(Hugh)組成的「明歌知欽」，卻以音樂作媒介，切切實實地做慈善。二人加起來過百歲，但每次做演唱會也落足心機，一手一腳Book場、揀衫，最後所得收入卻一文不收，全數撥捐慈善機構。近日他們更踩過界，連歌唱比賽也著手籌備，有趣的地方是，這個歌唱比賽有別於其他同類型比賽，因為目標參賽者也是以老人為主。
攝影：黃國立
隱蔽長者問題成動機：希望佢哋搵到人生下半場嘅價值
Hugh和Paul二人加起來近百二歲，退下工作火線的他們經常問自己，到底在餘下的日子想要什麼。生活的歷練讓他們漸漸由物質主義變成人文主義，更忠於自我地追求心靈上的富足，眼見身邊有不少上年紀的朋友雖然已退休，但仍然活力十足，當中更有不少人熱愛音樂和唱歌，於是打算將慈善與比賽結合。最初他們擔心，以老人歌唱比賽作招徠未必有人願意參加，怎料消息一傳十、十傳百，不少善長及義工團隊也拉大隊參與。
搞比賽的初衷除了讓人有一時三刻的快樂與刺激外，Hugh和Paul有更重要的一個目標：「而家香港長者人口比率開始上升，一部份係退休又有仔女照顧，享下清福過日辰。但同時我哋唔可以忽視，有部份老人家可能係冇人照顧，仔女結婚之後搬出去住，但又忙於工作，令啲老人家自己一個留喺屋企好悶。所以我哋好希望唔同階層嘅長者都可以參加，如果有仔女嚟支持佢哋自然開心，但如果冇仔女去做佢哋粉絲都唔緊要，我哋可以做佢粉絲。」
歌唱比賽只是一個手段，透過當中過程，他們希望可以改善獨居長者的生活情況：「現時好多長者，我哋睇落去都唔覺佢嘅年紀已經有65歲，佢哋仍然會有佢哋嘅能力去工作同發揮，所以我哋希望透過呢類型項目，減少隱蔽長者嘅出現，將來香港長者人口可能會過百萬，其實佢哋人生下半場仲可以貢獻更多。」
入行唱歌曾遭白眼 堅持追夢純粹為自己快樂
入行多年，Hugh和Paul也清楚自己在音樂圈的定位絕對不是十八廿二的偶像路：「第一年入行唱歌，都有試過遭受圈內專業人士嘅白眼，有時佢哋會問：呢個邊個嚟？咁嘅年紀仲出嚟唱歌。甚至喺表演場合有人會話：我哋唔識㗎啦，一陣唔洗介紹。」
一次又一次的經歷更令他們體會到年輕人入行的艱苦：「想投入演藝事業嘅年輕人要諗清楚，亦要好堅定，因為身邊會有好多聲音令你想放棄，甚至令你降低自己嘅價值觀。不過其實放眼去其他行業，都一樣會遇到同樣嘅經歷、同樣嘅人，所以最緊要自己揸緊信念，尋找屬於自己嘅快樂。」
保持正能量不代表離地：呎價兩萬令香港人自我價值變低
由於緊握信念，所以二人早前繼續推出新作品《微笑》，同樣以正能量作出發點，不過Hugh和Paul並非「離地一族」而對事情感到過份樂觀。曾經歷過不同年代的大風大浪，他們對現今的香港有這樣的看法：「我諗人生不外乎衣食住行，而我近年最大嘅感受係，我哋細個住公屋會同自己講，將來大個一定唔會住公屋。但去到近年有公屋住就已經好似中頭獎咁，住屋問題一定係最困擾香港人嘅問題，一層樓呎價兩萬幾，香港人嘅人工分分鐘都只係得萬幾兩萬，令大家嘅自我價值變得好低。」
但透過音樂，他們希望帶出一個訊息：「壓力一定會發生喺每個人身上，不過我哋要搵方法去減低自己嘅壓力，例如您好鐘意唱歌，就多啲唱歌，甚至你想大喊一場都冇問題，但要識得行返出嚟，透過呢啲行為去卸走自己嘅負能量，令自己重新上路。」