【蒙面唱將猜猜猜】古巨基吹蠟燭鬥長氣　憶當年暫別樂壇低潮

由古巨基擔任猜評人嘅內地音樂節目《蒙面唱將猜猜猜》第三季，噚日（18日）播出第五期。今集節目基仔除咗一如以往估「蒙面唱將」身份，佢仲同其中一位「蒙面唱將」battle吹蠟燭鬥長氣。

首先當蒙面唱將「超級變變變」一身盔甲裝扮上台時，一向充滿童心嘅基仔即時轉入卡通片mode，話想睇「超級變變變」同另一揭開面具嘅唱將「章魚機械人」蘇見信打一場，現場觀眾隨即大笑。除此之外，另一蒙面唱將「A4之王」表演吹蠟燭才藝時，基仔又再搞事，話要上台同「A4之王」battle吹蠟燭，十分搞笑。

隨後，蒙面唱將「磨菇」感歎重新唱歌好開心，基仔就即刻作出鼓勵：「我跟你感同身受，因為我也試過很長時間沒唱歌，大概兩年多之後再回樂壇，我感覺這個舞臺還需要我嗎？觀眾聽眾還需要我嗎？後來我就下定決定還是要把主力放在唱歌上，因為有機會再重返舞臺拿起麥克風就堅定著拿下去唱下去，加油！」作為前輩，基仔分享親身經歷勉勵後輩，認真窩心。