【鍾舒祺．專訪】留學時期曾遭白眼：人心係咪應該跟住時代進步？
鍾舒祺，在大眾眼中，總是樂壇中特別的存在。曾創作出多類型的音樂，Dance beat、電子、pop，甚至一首歌用不同風格演繹也試過。甚至在外型上，她完全沒顧慮地忠於自己，娃娃妝、穿環，幾乎已成為她的等號，這一切一切全為表達自我。但在她心目中，卻從來沒想過要把事物作任何分類，在自我表達的思考上，原來她深受幾段在不同地域生活的經歷而影響。
攝影：黃國立
創作全因情迷80年代事物 Sukie：人心係咪應該跟住時代進步？
鍾舒祺出歌的頻率絕不算高，但最少每次作品面世，也絕對是用心之作，亦言之有物。早前推出今年的新作品《裸泳》，由曲風、造型到美術設計皆以八十年代風格作骨幹，MV更明顯充滿著濃濃的《Blade Runner》這類Cyberpunk電影的影子。整首歌仿似對叛逆的一種描寫，但實際上卻是由一個念頭而開始，Sukie表示：「我好鐘意以前80年代《Blade Runner》、《Back to the future》呢類電影，好嚮往當中嗰種展望將來嘅美好。當時嘅人會花好多時間去砌一樣嘢出嚟，呢種心思正正係現代所缺少。當時嘅歌手、電影主角，全部都係敢於做自己，好似Madonna咁，佢嘅造型可以好大膽好無懼。然後我就諗，點解時代進步緊，但人嘅內心反而保守咗？」
台灣藝人比香港更忠於自己？ 由綜藝節目已經可以睇得出
在香港人眼中的Sukie，感覺總是特別大膽，由行為到造型，往往也像是比他人走前一步般脫軌，穿鼻環、中性打扮，這種種國際上定義為「Chic」的行徑，卻是香港受眾眼中的異類。甚至早幾年與姐姐鍾舒漫共同推出《SS14終極喪版》，糅合多種音樂風格在當中，由metal玩到小清新，令人聽得目瞪口呆，大概也沒人想過廣東歌可以這樣玩。這樣的性格，不難令人聯想到，是否跟她曾於台灣發展有關？
Sukie直言：「我唔會刻意思考呢啲係咪好有膽量嘅行徑，但的確喺台灣，真係個個都係咁。每個都好真實去做自己，不論上節目又好，收工又好，佢哋都會盡情去展示自己最真嘅一面，唔會怕尷尬，佢哋嘅世界整個環境都好吸引。但當你將呢種性格放喺香港，又好難想像到會出現咩化學作用。不過慶幸我同Sherman平時網上自己拍嘅片段，又會有網友感受到我哋之間嘅親密同快樂。」
事實上，比較起台灣、日本與香港的綜藝節目，也不難感受到港人的枷鎖之重。又或許是日本和台灣的電視台要比拼收視，所以千奇百趣的節目也想得出，但在香港，以《後生仔傾吓偈》為例，當主持談及稍為「踩界」的話題，已在網上被批判得體無完膚。對此Sukie亦認為與地方風氣有關：「大家可以先諗一下，台灣係一個咩地方？台灣係一個當你做咗一件事，下面留言嘅人有9成都係鼓勵支持你。因為呢個係一個風氣，佢哋心態上會比較開放，而香港呢方面就爭少少。」
造型問題未算最困擾 英國留學時期曾遭白眼
問題回到自己身上，曾經在台灣比賽的一段時間，Sukie臉上穿環較多，也試過因此被觀眾抨擊：「當時我試過成塊面釘咗差唔多30個窿，觀眾會覺得睇得辛苦。唔緊要，我覺得呢啲可以作出調整，因為我始終都係為人民服務，呢樣嘢係我其中一個責任嚟。」但數到自己最難過的一關，便要數到在英國留學的時期：「我覺得音樂唔應該分種類，呢個諗法係嚟自以前一段經歷。英國留學嘅時候，我讀書嘅地方比較偏遠，所以當地人冇接觸過大城市，思想會比較窄一啲。當時每日放學返屋企要經過一條橋，然後就會有人攞住啲石仔雞蛋，等我行過就掉我。因為佢哋會將人分類，佢會分咗我做一個種類嘅人，但到底點解佢哋要咁做呢？我覺得冇需要，但好多人偏偏就會將好多事情分類，我希望我可以唔喺呢啲分類裡面。」所以在往後做音樂的日子，Sukie也不希望為自己的作品加上任何分類，只要讓聽眾滿足於音樂的本質便足夠。