【多圖】Twins澳門感動喊住唱 阿嬌：仲可以行返出嚟!
Twins假澳門威尼斯人舉行《TWINS LOL世界巡迴演唱會》澳門站，Twins到澳門開騷，引來歌迷到場支持，全場爆滿。演唱會與年頭的香港站一樣，以《着睡衣跳舞》熱鬧開場。
唱到《丟架》時，兩人穿上「熱氣球衫」登場，遠睇就似有個大蝴蝶結在背後，唱畢後，兩人講起與澳門的淵源:「第一次演出就喺澳門，唔知有冇人睇過呢，但有睇過都唔知我乜水，個次係我哋公司嘅群星騷，有祖兒，謝霆鋒，Eason好多前輩，介紹我哋出嚟嗰時，啱啱有第一首歌，但冇組合名，佢哋介紹我哋做香港最人氣女子組合，16年前喇，好慶幸16年前係冇人識，但16年後企喺到你哋全部都識我哋。」
唱完一系列Sidetrack後，鍾欣潼(阿嬌)突然在台上問蔡卓妍(阿Sa):「有一件事我好擔心你，大家都好擔你，點解你到依家仲係單身嘅...真係吖，導演要人問埋啲咁嘅嘢嘅。」阿Sa聽言即怕羞話因為自己有阿嬌，但得到導演任務的阿嬌沒有放過阿Sa，繼續催婚:「咁我都唔想因為我綁住你嘅，我都想你快啲嫁出去。」阿Sa就即場話要搵「荀盤」，又轉話題:「導演係咪想介紹下一首歌，我哋繼續做《就算我們都是華麗的單身族》啦!」
兩人又感觸講到出道16年大家都經歷了好多，阿Sa:「仲可以企喺到!」，阿嬌:「仲可以行返出嚟!」令粉絲憶起16年來發生過的事，接着唱出《我們的紀念冊》，唱到尾段時，阿Sa更不禁落淚，要擰轉面掩蓋淚容，阿Sa說到實在太感動，阿嬌亦即上前安慰:「嚇親我，一另轉頭...(見到阿Sa喊)。」
為了緩和氣氛，阿嬌就話要做些開心事，更為11月22日生日的阿Sa唱生日歌，場面感動。阿Sa亦即場許願:「喺到祝你哋全部人開開心心，身體健康，繼續愛我哋。」
而點唱歌環節，Twins突然在台下發現張致恆(Steven)，兩人即叫Steven上台合唱首本名曲《死性不改》，Steven表示剛在澳門參加擲飛標大賽，三人又大嘆:「但Kenny(關智斌)唔喺到，佢依家係橫店老臘肉。」Steven即補充一句:「係橫店老臘腸!」令全場爆笑！
Steven在台上亦不忘呼籲大家在《萬千星輝頒獎典禮》中投票，自言有份主持的《你健康嗎?》會入圍最佳綜藝。三人的大合唱迅間勾起全場童年回憶，最後，Steven在台上感言:「好多謝你哋十幾年裡面咁關懷愛護我，嚟緊唔知有冇機會做師弟㗎喇，多謝晒！」咦？近年Steven是非多多，先與前女友莊端兒分手，又自爆性上癮，形象插水，此言是否想暗示往後不獲英皇續約？事後Twins透露估計Steven應該快將完約，不過都是第一次聽，還是留給Steven親自解畫較好。