【十大中文金曲】譚嘉儀多謝錯商台　森美「神預言」開口中

話說《十大中文金曲頒獎音樂會》中，其中一個最令人喜出望外的，就是譚嘉儀擊敗鄧小巧奪得「最有前途新人獎」金獎，不過嘉儀可能太緊張，一時口快快講錯：「好多謝商台，吖唔係，係港台。」由於是現場直播，蝦碌鏡頭出晒街，有網民見到，就留言講起早兩日（1月3日）由森美小儀主持的商台節目《早霸王》中的神預言！

曾贏得無綫電視歌唱選秀節目《超級巨聲3》季軍的譚嘉儀，昨晚在港台的《十大中文金曲頒獎禮》上出醜（【十大中文金曲】譚嘉儀奪最有前途新人金獎　激動落淚：是神蹟！），原來早在3日的商台節目《霸王知己》環節中就提過類似題目，森美小儀與RubberBand討論的時事題，係咁嘅：

頒奬典禮上，最驚咩事發生喺自己身上？
A) 多謝錯頒奬畀你嘅司儀、公司
B) 頒奬司儀叫錯我個名，興奮上到台上至話佢講錯！
C) 聽錯以為自己得奬，衝咗上台

當時另一DJ西瓜聽到「選項A」時覺得緊要關頭，就算多謝錯主辦機構都會獲原諒，不過森美就話：「唔係呀，依個錯真係太大喇，即係你諗下，你係其他電台裡面多謝商台咁喎。」連小儀都話這種事好難解釋。

而譚嘉儀在十大正正就是說中了「多謝商台」一句，森美大神，果然厲害！

不過已經說了出口，是否已經沒有機會再挽回呢？小儀就教路話：「仲兜到嘅，講多句對唔住，多謝叱咤903嘅DJ播我哋嘅歌，不過其實你哋依邊仲播得多！」

再提供多一個教學，就是去年吳業坤在《 叱咤樂壇流行榜頒獎典禮2015》，奪得「叱咤樂壇生力軍大獎（金獎）」時，居然話：「首先我要多謝TVB…」，更不斷感謝TVB高層樂易玲、曾勵珍等人，當時森美都忍不住說：「TVB（勁歌頒獎禮）就『圈』你，所以你喺商台多謝TVB。」但坤哥依然不停多謝有關TVB、《超級巨聲》的事。

最後、最後今年坤哥依然在叱咤奪得「叱咤十大」及「叱咤樂壇我最喜愛的男歌手」，所以話多謝錯人又有咩好怕喎，唔會影響你得獎，(好似係)。

雖然鬧出個大笑話，不過森美坦言唔想開口中，仲安慰話通常大台唔會見怪，叫譚嘉儀唔洗擔心。而嘉儀都有回覆道：「當晚得獎時實在太緊張，希望大家可以原諒，亦非常多謝森美大哥既安慰！」就係咁，件事告一段落，不過下次小心啲喇！