【Big Big Channel】課金收入落藝人袋? 簡淑兒:未講到好實!

撰文:
最後更新日期:

TVB嘅Big Big Channel今日開始試玩,打住直播嘅旗號,可以同星體驗視頻通話嘅感覺,暫時見到胡定欣、龔嘉欣、孫慧雪、林頴彤、黃心穎等藝人都有開過直播,和VOOV及其他內地直播平台一樣,都有送禮物的功能,最簡單的心心星星依啲係唔使錢嘅,進階版嘅禮物就要用代幣買喇。

Big Big Channel宣傳得好行。(張嘉敏攝)

最平的禮物是波波糖,價值5個代幣,朱古力和讚好手勢分別值20和25個代幣,之後的唇印一跳就跳到180個代幣,而暫時最貴的禮物是「收視冠軍」要520個代幣。

禮物平有平賣,貴有貴賣。(截圖)

睇完禮物當然都要睇下課金嘅玩法:

最貴嘅36000個代幣要1848蚊!(截圖)

咁計落一枝波波糖都係4毫子港幣,但要買最貴的收視冠軍的話,多謝承惠42蚊!抵唔抵真係見仁見智,但作為粉絲最關心當然是有幾多錢係落到偶像袋啦!

Jessica仲未用過Big Big Channel玩直播。(符祥定攝)

《香港01》記者致電簡淑兒(Jessica)問起關於Big Big Channel的問題,她笑言一直覺得拎住電話自己講嘢個感覺好奇怪,所以一般都好少玩Live,新App都未試過玩,但之前公司有同佢哋簡介玩法:「有講解,但好似好複雜咁,噚日都有message我叫我試玩,但我未有時間。」

Jessica話知道係公司App玩Live會有禮物功能:「內地有啲App都係咁,同我們都係sell依樣嘢。」咁收到禮物會唔會分返帳畀佢哋呢?Jessica就話其實係有嘅:「不過我未有時間了解,好似係收到一朵花會分到唔知幾多錢,上次有講,但好似未講實,有個大約個數,百分比有幾多我就真係未知。」

Jessica平時咁鍾意自拍,直播應該都難你唔到嘅。(Instagram圖片)

其實聽落都唔錯吖,藝人搭車冇嘢做,就可以拎部電話出嚟玩下直播,同粉絲聯誼下還可以賺下外快。記者再致電今日有開過Live的林頴彤(Bella),Bella表示Live的時候有收到好多禮物,但對於禮物轉換成錢方法就同Jessica一樣唔多清楚,講到外界有其他App對送禮物最多的粉絲有獎勵,TVB可有類似玩法?Bella就笑言:「我可以開多啲直播同畀多啲生活嘢大家睇,或者試下送禮物回饋大家?我都未諗,因為真係剛開始玩。」

Bella都有玩Big Big Channel。(資料圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。