【Big Big Channel】首日開波唔見視帝視后 擔點擊要靠阿Bob?

撰文:
最後更新日期:

今日就係TVB新App「Big Big Channel」第一日開台,TVB當然吹晒雞叫所有藝人都一齊玩直播啦,其實個App都算多元化,分咗「煮食」、「搵食」、「扮靚子」、「後生仔」、「娛樂新聞」幾個主要大Channel,今次仲唔止搵自己藝人直播,仲搵埋一班網絡達人,好似「小P老師」咁,陣容都算好盛大。

又好似好多野睇咁。(網上截圖)

但個App一打開雖然就見到有靚女藝人胡定欣、龔嘉欣、姚子羚、黃心穎等等開直播撐場,但掃多幾吓就發覺好多藝人都唔識嘅,說好的Big Big Channel呢?邊度Big?不過又唔係嘅,多咗個平台畀大家留意吓綠葉演員,多個曝光機會都幾唔錯。

大家不妨望望認得邊個藝員:
+4
+3
+2

不過第一日開啫,大家畀啲時間TVB啦。可能因為今日Channel啱啱開台,各位視帝視后未得閒玩Live,所以竟然畀阿Bob(林盛斌)半路殺出個程咬金,贏晒其他靚女藝員,成為今日全日最高點擊冠軍,佢自己都話估唔到:「好開心見到個View數都好多人睇,TVB啲同事同我講開咗個Channel之後暫時瀏覽量最高係我果條片,話咩邊個邊個都唔夠我高,但今晚Ben Sir開talk騷,我幾勤力努力都好,最好都只能夠屈居亞軍,輸畀阿Ben Sir。」

真係估唔到阿Bob竟然贏咗一眾靚女,果然係好有觀眾緣!(網上截圖)

今次係阿Bob處男下海,皆因原來佢玩咗咁耐Facebook同IG都未試過直播,第一次就咁就畀咗Big Big Channel喇,佢話嚟緊會做更多親子嘅專題:「因為以前我連自己Facebook做Live都未試過,今日講親子係幾得意,唔止我,仲有幾個囡、工人、外母都出晒鏡。嚟緊慢慢諗下有咩話題可以諗,今日講親子除左講我屋企,今次囡囡派卷,我會話畀佢知考試分數唔緊要,最緊要佢有冇努力 ,帶出求學不是求分數。」佢仲話之後嘅Live都有呢啲訊息帶畀觀眾,各位新手上路嘅爸爸媽媽記得Follow阿Bob喇!

今日阿Bob唔止做直播,仲幫TVB做埋司儀!(網上圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。