【踩過界】李佳芯性感衫跳熱舞　難受似精神虐待：偏偏啲人就鍾意

昨晚《踩過界》播出第二集，吸引程度直線飆升。除了譚凱琪近乎全裸的鏡頭（雖然濛濛哋），還有一眾男士心目中的女神李佳芯出場了。話說張振朗個朋友趙永洪學生時期暗戀總領袖生李佳芯，FF期間，腦海回想身穿校服Look的李佳芯當值捉人儀容嘅樣，真係又pure又true。毒男表示，好想瘋狂畀佢捉儀容呀！後來張振朗就幫朋友，到處尋找女神的蹤影，結果去到酒吧的舞池，見到李佳芯正在夜蒲，她身穿超貼身短裙，徘徊眾多男士之間，火辣熱舞之餘，眼神姿態都非常嫵媚撩人，搞到有人忍不住伸手想摸Ali。最後都被Ali一手推開，再遇上張振朗，呢一幕睇到人硬晒呔。

雖然拍出來的效果見到Ali堅係跳得好正，不過對她來說，要扮演一個喜愛夜蒲的法官，並不是一件易事，她早前坦言被精神虐待似，少有著到咁性感，不太習慣：「經常都要穿上貼身戲服，還要我表演跳性感舞，拍攝當日我也是即場排練的，本身對跳舞零底子，仲要着住5寸高踭鞋，好彩出來的效果不錯。」即是話Ali的性感場面會陸續有來，遲下還會與王浩信與張振朗有床上戲，據聞仲好激情。雖然ALi覺得似精神虐待，但網民咁鐘意，心情都幾複雜。Ali就話：「對於冇學過跳舞嘅我嚟講，有咁多人鍾意真係好開心。」對於精神虐待一詞，Ali再補充：「其實係指啲衫，因為平時唔鍾意著性感類嘅衫，覺得唔係好啱自己，但偏偏啲人就鍾意。」

除此之外，講到明《踩過界》，劇情都真係幾踩界㗎。有魏惠文對住譚凱淇自瀆之外，為了迎合一眾腐女需要，加插了王浩信與張振朗hehe情節。第二集就有「天地豪情」hehe版，王浩信坐上張振朗電單車座駕，架車chok一chok，王浩信一手摟住張振朗條腰，相信唔少腐女睇到呢幕會尖叫，然後再建立新CP粉。