【Big Big Channel.任噏亂評】飲咖啡都Live3次 究竟直播睇咗乜

撰文:
最後更新日期:

TVB新App「BigBigChannel」已經出咗幾日,唔知大家有冇睇過,但其實好多藝人都已經密密玩緊,好似啱啱開嗰陣大家就算冇主題,都衝晒出嚟Live。冇計,TVB出新App,你唔係唔撐啊?所以開台嗰日好多綠葉湧出嚟,唔好話叫唔出個名,就連個樣都冇印象,如果唔係喺個App度見到佢喺「藝人」呢欄,我都唔知佢係藝人。

譚偉權成功飲咖啡洗咗版。(網上截圖)

好似今日咁,一打開個App就見到呢個叫譚偉權嘅藝人,飲杯咖啡都Live咗3次,令人忍唔住Click入去睇佢做咩,佢拎住杯咖啡大讚話加咗冰都係咁濃,唔知仲以為佢幫人哋賣緊廣告。雖然佢就唔太出名,但多咗呢個App之後,幫助咗好多綠葉演員增加曝光機會,有時無無聊聊咁,又會引到你Click入去八卦吓,好似今日小儀喺《早霸王》都有講到:「明星做Live又係無聊架喎,講嘅野冇特別內容,但你真係會睇如果你識嗰個Artist,真係會冇啦啦睇咗佢個Live幾分鐘。」

坤哥好勤力,都未瞓醒就即刻開直播。(網上截圖)

其實又真係喎,好似前幾日坤哥(吳業坤)瞓醒口噏噏,你唔知佢講乜又有幾千人睇;龔嘉欣搭車冇野做同大家吹水又有幾千人睇,連心姐(謝雪心)都追上個Trend同大家玩Live睇佢同兩隻愛犬Hight Tea。潮流興玩直播,唔怕你無聊冇Point唔好笑,最緊要你夠膽播,大家就夠膽睇!

睇完心姐直播,發現佢份人又幾風趣。(網上截圖)

其實好多藝人嘅直播都幾無聊,但又吸引到好多人去睇:
+13
+12
+11

又幾過癮,即場問大家夾咩,佢哋就真係夾咩。(網上截圖)

好似尋日咁,黃翠如同農夫去咗日本拍旅遊節目,佢哋都好識做一得閒落去日本最Hit嘅夾公仔鋪同大家玩Live,今次佢哋唔係冇野做叫大家坐定定睇佢哋夾公仔,居然即場問大家意見,網民話夾邊樣,佢哋就即席夾嗰樣畀大家睇,都算幾有誠意啊。

其實直播唔係咩新玩意,Facebook好耐之前已經玩緊,點解依家大家咁落力去做直播啊?因為大台吹雞叫大家用宣傳新App嘛,邊個敢唔用?可能仲會Check住邊個藝人冇用,邊個藝人用得少,用嚟計算大家嘅「工作表現」,有冇劇拍、做唔做到女一定係做女二,可能就係睇你勤唔勤力玩BigBigChannel喇!

雖然BigBigChannel就真係無無聊聊,對一眾粉絲或者電車男嚟講都可以話係恩物,因為佢可以喺你食飯搭車冇野嗰陣陪吓你,怕羞仔又唔駛出聲,又可以打字同偶像傾吓計。雖然條Channel依家就冇咩大搞作,都係睇吓藝人行行企企咁,但相信遲啲港姐選舉肯定會大搞,叫大家用個App睇直播,又會叫大家畀錢送禮物,睇住嚟啦!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。