卓韻芝扭傷腳發表拒絕兵仔論　情願孤伶伶：有多少人當兵當得痛苦

「條女很清楚收兵好過嫁人，真的身份不過女神……」有網民將陳奕迅首《落花流水》改詞暗嘲香港地女仔嘅「收兵文化」。到底咩叫收兵？就係個女仔對冇意思，唔會同你一齊，但又招攬對佢有好感嘅男仔做「觀音兵」。社會對「收兵」兩個字反應好兩極，有人覺得收兵係一種惡行，濫用了人哋對你嘅好感，去點人做呢樣嗰樣，但又吊住你條癮等你以為你仲有機會；亦有人覺得收兵係一種讚美，皆因收得兵嘅個樣或者身材都應該幾唔錯，通常係條件優厚嘅先收到兵。

但收兵可以話係一個願打一個願捱，冇話邊個啱邊個錯，但社會各界對呢個話題爭議不斷，收兵是對是錯可以話係一個千古懸案。

有才女之稱嘅卓韻芝一向都有出書講愛情，亦時不時在社交網站同大家分享自己嘅愛情觀，可以話係港女界嘅KOL。今朝佢就收兵呢件事講吓自己嘅睇法，事源佢扭親要去睇醫生，朋友就問佢做咩唔叫人陪，仲話佢：「你連兵都沒有，枉為人！」，阿芝就覺得唔應該收兵，因為佢唔想利用人哋感情，佢話：「如果知道別人喜歡自己，而自己沒有特別意思，就向對方澄清。澄清了，對方可以選擇：當朋友，或離開；我覺得這樣還算誠懇待人吧。」呢個咁清新脫俗嘅港女諗法的確好少有，通常女仔都會覺得唔好意思，唔忍心拒絕，就會唔覺意咁派咗「好人卡」，唔止愛需要勇氣，其實拒絕都好需要勇氣。

用「敢愛敢恨」嚟形容阿芝最適合不過，記得之前佢身邊嘅男性友人一個換一個，仲曾經疑似同鬼佬男友嘅床照流出，佢亦無避忌過講感情事。喺上年嘅棟篤笑入面仲繼何韻詩之後公開出櫃，認自己係雙性戀者，當時都令娛樂圈震驚過，06年嗰陣因為媽媽過身，佢曾經食安眠藥寫遺書自殺，好彩最後冇事救得返。你可能會覺得佢好偏激，成日好似喺度衝擊大家嘅底線，其實佢只係一個好勇氣去表達自己嘅人。