【後生仔傾吓偈】馮盈盈笑嘉賓「原來係處」　貼地港姐：搞下笑啫

話說兩位港姐麥明詩與馮盈盈，聯同陸浩明主持節目《#後生仔傾下偈》，並請來8位90後KOL上去吹水，話題為求貼地，第一集就講下讀大學有幾窮。甚麼題目都不是重點，焦點就是兩位港姐都是做節目主持，不過睇足20分鐘，發覺馮盈盈表現得好放，反應都是真情流露，而且同一班KOL好啱嘴型，感受到雖然她出身小康之家，但都幾貼地，第一次做主持都算係咁。

由於馮盈盈流露真性情，所以主持過程都忍唔住爆響口。一開初幾個KOL自我介紹時，講到貌似羅仲謙的型男Danny時，馮盈盈進撃地問：「你有冇ex（前度）都好似楊怡？」Danny隨即反問：「你又知我拍過拖？」誰不知馮盈盈第一下反應就是：「原來係處…」她看似爆響口，之後立即飲啖可樂先，六號見狀就幫她兜返：「佢係將感情處理得好好啫！」仲話馮盈盈頭先口渴，所以講唔晒成句㖭，反應真係好快。

其後講開讀書有幾多錢零用，家境不錯馮盈盈也不避違地表示有$10000零用，她見到自己咁多零用都有點心虛，她就解釋：「多謝屋企人咁錫我啦。」不過她都有講到讀書時，都有做過一個月兼職售貨員，其後就做模特兒搵下外快，所以她有得不只$10000呢個數。不過麥明詩聽完爆咗句：「而家自己搵錢比之前賺多咗唔係好多。」聽落好似好多嘢爆，但實則大學生畢業出嚟賺嘅錢係咁上下。

馮盈盈接受了《香港01》訪問回應放得開的主持表現：「其實呢個節目想召集一班年青人，開開心心咁傾偈，等大家了解現今青少年係點同諗緊咩，希望營造casual嘅氣氛等各位暢所欲言，所以我都唔想做典型主持人，想融入班嘉賓，好似朋友咁同佢地傾偈吹水。咁啱我同佢地年齡一樣，又係啱啱大學fresh grad（剛畢業）， 因為有相同背景同共同語言，例如啲大學潮語，所以明佢地講咩同特別夾嘴型。」她仲講笑話：「我敢講呢個節目係繼ThinkBig兒童節目之後平均年齡最年輕嘅節目！」至於講到爆咗句「原來係處」，馮盈盈曲線回答：「做節目時我感覺真係好似以前Ocamp或同大同gathering咁互相吹水講笑，好快就傾得好興𡚒同投入，所以都會互相講笑
講啲比較爆炸嘅內容😂其實都係無傷大雅嘅玩笑，純粹為節目效果，搞下氣氛搞下笑啫！」