港姐龐卓欣唔想身體變壞拒簽TVB 當歌唱老師YouTuber自由自在
今屆香港小姐經過一輪鑑賞同評頭品足之後終於有12位佳麗入圍決賽，究竟年年有人爭崩頭選美係為咗乜？好似麥明詩咁拍劇？定係好似邊個邊個咁釣金龜？
前兩屆，即係麥明詩嗰屆，奪得亞軍的龐卓欣Ada既是富二代（爸爸是東驥基金管理董事總經理），男友是鐘錶界名人孫秉樞個孫孫智威，大可撇除釣金龜之嫌，當時TVB的樂易玲都應該係咁諗，於是同Ada傾藝人合約問題，但係Ada竟然咁答樂小姐！
Ada憶述當年對話仍不禁要呻：「一選完她就定了一些人啱拍劇，一些人啱做其他，所以只係同我傾拍劇，但如果我係一直想拍劇的話，我係冇問題，但係值唔值得搞到自己身體變壞呀，或者唔夠瞓呢？因為我都見啲師姐拍劇真係好辛苦，試過5日唔瞓覺，日日等埋位，要我等全日呢，我會好嬲！」加上樂小姐要求她一簽就5年約，而且月薪得6千，Ada覺得無法接受，故拒絕簽約。「TVB有百幾個藝員，但係只得岑麗香、黃翠如、王君馨才做到代言人呀其他嘢呀咁，我覺得紅嘅機會率好微囉！」
唔簽約當然唔錫住你，Ada坦言：「決定唔簽之後，佢就少咗曝光率給我，出少咗好多活動，我亦唔可以出去做嘢（接job），因為要履行香港小姐的義務。」於是一年後Ada卸任後便正式同TVB講拜拜。
問題又來了，Ada為什麼要選港姐呢？原來她大學時主修聲樂，又在美國曼哈頓音樂學院唸書，一心向歌唱事業發展卻苦無門路，她解釋：「我諗住在才藝表演環節唱歌，咁就好多人知道我識唱歌。」她說也考慮過加入TVB，但有如坐監又人工低的待遇實在難以接受。
Ada現時是歌唱老師及在YouTube教化妝和拍旅遊短片等等，最近獲Viu邀請拍攝生活資訊節目《龐卓欣的Beauty Viu》到韓國取景，7月14日便會在Viu app上架，並已準備再赴韓國拍第二輯。雖然Ada曾一度擔心不簽約TVB便無緣加入娛樂圈，之不過唔嘗試又點知無出路，Ada就對現在自由自在不被綁死的工作環境十分滿意了。