【專訪】森美理性愛情論唔係人人啱聽:我覺得所有男人都要做兵

撰文:
最後更新日期:

有人話,男人是理性的動物,女人是感性的動物,分手的時候女生總是哭到撕心裂肺;男人呢…我唔知,因為筆者是女生,直至我和森美做了這個訪問……

攝影:龔慧

森美絕對稱得上是理性動物的代表,當我和他談到愛情時,他居然說:「所有嘢都好簡單,都係身體上嘅荷爾蒙同DNA嘅結合嚟。」

請容許身體內充滿浪漫細胞的筆者有兩秒時間反個白眼先。

森美繼續說:「感情感性係文人做嘅,睇完抒發咗會好開心,而我嗰啲你睇完係冇抒發到,尤其係女仔係好唔啱睇嘅。」

OK,個訪問可以完喇!(咪傻啦,男嗰啲唔使睇呀?打稿啦你!)

如果你係一個愛浪漫嘅女生,記者話你知,呢本書你啱睇!助你了解男朋友的心底話。

理性地戀愛

今年書展,森美將會推出一本叫《暖男之規條》的書,呢一本笨唔係一本工具書,而是用理性的角度探討時下男女戀愛方法的書,森美表示:「我有寫過一篇點解成日都鍾意賤男嘅文,係因為DNA定咗你鍾意嗰啲人,我叫呢啲做愛情壞習慣,譬如你鍾意搞笑嘅,但搞笑嘅好多時都花心,咁咪成日都揀中,有啲生活模式同個人嘅性格係掛勾㗎嘛。」

森美相信愛情是生理反應的一種,正如你驚時手腳會充血,你見到喜歡的人身體好自然會有更多荷爾蒙分泌,所以青春期特別易有愛的感覺,森美甚至提議用好科學的方法解決戀愛問題:「有醫學報告話失戀好傷心,可以食粒止痛丸,因為傷痛嘅感覺用止痛丸止到,所有人都覺得愛情係感覺,但係感覺係來自身體機能嘅反應,大部感性嘅人都唔鍾意聽我講呢啲嘢。」

+10
+9
+8

做兵好閒啫!

既然森美喜歡分析愛情,不如分辨一下暖男和兵有什麼分別?大哥轉一轉腦筋,就說了一句:「暖男係大男人,好關心好體恤,會做啲唔係以自己行先嘅事,相反小男人會同你斤斤計較,暖男係姿態冇咁強,一個溫柔嘅大男人就係暖男。」

另一方面,森美就認為男人「入伍」乃愛情中的「兵家常事」:「兵呢,我覺得所有男人都應該要做兵嘅。」(港女記者表示:成個訪問呢句最啱聽!)森美繼續解釋:「唔做兵係冇得追到個女仔㗎嘛,唔知幾時開始覺得追個女仔就係做兵,咁所有愛情都係兵嚟㗎啦,你個男人唔去服侍個女仔,人哋點會鍾意你啫,我諗每個男人都要做兵囉。」

「所有男人都應該要做兵」,得,我只聽到依句。

不過俗語有話「有咁耐風流,有咁耐折墮」,森美應該都好Buy呢套,事關佢嘅收兵理論仲未講完:「做兵就係要追求你嘅芳心吖嘛,我得到你芳心就贏咗你㗎喇,一贏咗你就到你做我兵喇喎。」森美直言每個年代都有兵的情況,不過以前啲女生追返咁上下日子就首肯應承:「依家啲女仔自主獨立好多喇嘛,咪繼續有兵囉,係個社會嘅轉變嚟嘅。」

想知點樣用理性睇愛情,記得買呢本書。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。