【開心速遞】演拜金女Mandy入晒血 謝芷倫其實好樸素:唔好名牌

撰文:
最後更新日期:

早幾集的《愛.回家之開心速遞》,劇中大小姐的秘書Mandy是極拜金的港女,為了錢而跟Terry一齊。飾演這位秘書小姐的藝人名叫謝芷倫(Jan),對於拜金女這個角色她不會陌生,因為在《幕後玩家》中飾演Rebecca時也是做拜金女。不過在接受《香港01》訪問時她指自己絕對不像劇中一樣拜金,她說:「拜金女係我啲角色啫,識我嘅朋友都知我一向穿著好樸素㗎,我不好名牌的!雖然我經常演類似形象的角色,但每次我都會有不同演繹,希望藉着演不同角色磨練演技。」但Jan對演拜金女這種性格的角色卻可以演得入形入格,證明演技真係好!

李偉健同Jan老友鬼鬼。(謝芷倫Instagram)

Jan其實是香港電視出身,2012年從澳洲讀完書回來後便投身演藝事業。當時在港視主力演了3套港劇,2套配角1套主角,其中擔當主角的《大眾情性》中以職業性治療師現身,將其專業演得十分出色,因此大受歡迎。加入無綫是因為參選港姐,Jan表示:「當時知道港視未能拿到電視牌照,已經開始計劃岀路,服務了港視2年。港視滿約後,freelance拍電影同做主持,見到有港姐招募,就去試一下。」雖然最終在決賽中落選,但亦為她之後加入無綫而鋪好了路。

《大眾情性》唔知大家又有無睇過?(網上圖片)

Jan在《愛·回家之八時入席》入面叫做Christy,唔知大家記唔記得呢?(謝芷倫Instagram)

加盟無綫第一套劇便是為愛.回家系列的第三輯《愛.回家之八時入席》,雖然人工未及港視,不過她依然都拍得好開心,她說:「拍劇是多勞多得的,愛.回家是連續劇,好好彩一入TVB就入了愛.回家之八時入席,完了就入現在這一輯,都返得好密啊!上一輯有180集,今輯應該多過180集,希望我都可以長拍長有啦!之前的一輯愛.回家持續了幾年,還拍埋綜藝節目《馬家開飯》,成劇人都好close,開心速遞劇組都好close㗎。」入了無綫接近兩年,基本上大部分時間都是演愛.回家,會否對這個方式感到厭悶呢?顯然阿Jan十分滿意現在這個狀況,亦都十分喜歡劇中的角色,她說:「我接到這個角色已經覺得自己好幸運,好多同事都好想入到愛回家這個連續劇,我估係因為d劇岀得快,因為邊拍邊岀,而且長劇,起碼180集,所以我好感恩監製編劇寫咗這一個角色俾我。開心速遞Mandy這個角色其實係好有發揮嘅,在戲中要奉承林淑敏大小姐,又要同呂慧儀鬥嘴,又要做個醒目能幹嘅秘書等,又有感情線。個角色好立體,拍愛回家一點都不悶。」的確這系統長拍長有,演員絕對不用擔心做不夠騷,之前朱慧敏在訪問時亦說過因為拍愛·回家而買到樓,難怪那麼多演員想入劇組。

愛回家劇組真係好似一家人。(謝芷倫Instagram)

入行幾年,拍劇的辛酸一定有,Jan堅持一定要真人上陣不用替身,她說:「拍劇幾年唔算長,試過好多較為危險嘅鏡頭,我都親身上陣。我對自己演岀有要求,每拍一場我都會加左d壓力俾自己。拍攝過程好愉快,好享受演出,大家會即場度下橋豐富劇本。有次拍攝外景,要被水射,射到成身濕哂,會有點唔舒服但我無怨過,我覺得值得。有次拍電影,我做爆破反應,爆破彈炸完之後我要做個向後翻落枱面嘅動作,因為爆破嘅力幾大,我基乎由枱向後滾翻地下,自己都嚇親。還有次拍內地電影,有場戲講我同另這架單車相撞而跌低,我冇落軟墊,我真係連人帶單車跌左落地,痛到喊左岀來。」其實有運動底子的她要做這些動作都好有難度,不怕受傷這種敬業精神十分值得嘉許!

+5
+4
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。