【任噏亂評 】《超時空男臣》勁Hea都好睇過《前度》 其實好灰!

撰文:
最後更新日期:

唔知大家8點半有無睇到TVB《超時空男臣》同9點半ViuTV嘅《瑪嘉烈與大衛—前度》呢?前者未播之前有唔少網友都話套劇擺明抄韓劇《閣樓王世子》,玩穿越之外,又係由古代返現代搵返失散咗嘅太子妃。到放工漏夜用myTV SUPER睇番《超時空男臣》,睇之前都冇抱寄望,都係為應付「腦細」先焗住望一望,點知睇完嘅感覺係好似啲賀歲片得啖笑,無咩劇情但求開心笑下,但笑下啲時間又好快過喎!笑完之後就開apps睇瑪嘉烈與大衛,ViuTV果然係ViuTV,用16:9加上下黑邊,電影感好強!加上袁澧林同劉俊謙咁靚女靚仔真係好過睇啲綠色嘢護眼,btw成套劇就係不停拍到佢地好靚好正,畫面太美,但觀眾就死咗囉,點解?因為悶到死咗呀,睇咗好耐都唔知想講咩。好彩套劇得20分鐘咋,如果係播1個鐘嘅話,我應該會選擇去瞓覺!!!

唔知鄭子誠會唔會穿越到現代呢?!!

《超時空男臣》有啲位好笑嘅。

《超時空男臣》套劇暫時嚟講我最深刻嘅唔係三位穿越到現代嘅袁崇煥、左光斗同李進忠,而係張誠。飾演呢個角色就係有「完美奸人」之稱嘅鄭子誠,佢係第一集戲份都好重,隔住嗰mon都聞到陣奸味,有幾幕佢仲要旁白,好似聽緊收音機咁(明明係奸戲嚟㗎嘛!),唔知佢會唔會出現係現代,如果有我覺得套劇會更有追看性。講返嗰三位主角蕭正楠、曹永廉同何廣沛先,蕭正楠曹永廉今次就食住《公公出宮》條水,再拍住上拍劇,我又唔太期待佢地有咩演技。但何廣沛近年就幾乎每隔幾個月就見佢有新劇出,今年3月播嘅《親親我好媽》佢飾演嘅文亮熙又pure又true嘅style,係TVB真係買少見少。今次係《超時空男臣》扮太監都幾似,而且把聲真係幾陰柔,唔知之後會唔會被定型係古裝劇就做太監呢?(希望唔會!!)只不過有好多人都話啲歷史完全錯晒,其實唔明大家點解會覺得咁出奇…TVB嘅嘢…你懂的!

Angela好靚呀!!!!!!!!!!(錯重點!!)

杜小喬係劇入面好多對白。

實不相瞞《前度》呢套劇我真係期待咗好耐,當然係私心想睇兩位男女主角喇,始終套劇有佢地加持好似唔同啲咁。第一集雖然短短20分鐘,已經係返望錶,因為真係有啲悶,唔似之前《詭探》咁有張力,要一個鐘先夠喉。《前度》呢套劇係啱播20分鐘,男女主角幾靚仔靚女都好,劇情太悶太長會恰着咗。最重要嘅係袁澧林、劉俊謙對白真係唔多有啲失望,反而女二杜小喬講得最多(好似佢先係主角咁~),搶晒我女神啲對白,我唔係想睇你呀!!所以話呢,內容先最重要,男女主角有幾靚都無用,起碼《超時空男臣》膠得嚟都算係有些少劇情,笑下都好呀。就好似行緊電器舖啲電視機咁,靚機永遠淨係播畫質靚到暈但內容悶到嘔嘅4K試機片,同現實電視會播嘅節目完全唔同。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。