張彥博直播脫毛及唱歌高收視：Serve真係需要我嘅人。

一個藝人為咗拍劇，到底可以去到幾盡？張彥博有份演出的新劇《超時空男臣》才剛播出，但其實他已經為《棟仁的時光》忙到天昏地暗，兼為下套新劇做準備──生掹腳毛。話晒都係人生第一次，阿博都好醒目咁喺FB做直播。雖然阿博兩手有準備，買齊蠟紙、眉鉗同脫毛膏，但對脫毛零概念加上又要快，結果最後決定出動脫毛蠟紙，雖然不少網民即時教路「搓熱蜜蠟紙」、「冷水洗腳」，其好友Kellyjackie更多次留言「唔好重複同一個位。」、「你冷靜啲啦」，但阿博似乎已經被脫毛衝昏頭腦，一腳多貼之餘仲要同時撕下……那種痛入心扉的感覺，網民真係隔住個mon都完全可以感受到。而短短半小時的脫毛過程亦吸引逾二千名網民留言。

阿博接受《香港01》訪問時笑言直播之後，收到過百朋友WhatsApp慰問。「佢哋問我係咪受咗咩刺激，又問我做咩咁睇唔開。」阿博又承認直播時因為太專注在腳毛之上，所以基本上唔係好睇到網友同好友Kellyjackie的提議。「其實Kellyjackie一向都是這樣，我成日笑佢似我阿媽，會好照顧我。」

近期由於Big Big Channel關係，一眾藝人簡單如食飯、行路都做直播，睇返阿博過往的直播，雖然多以音樂為主，但不時都會有驚喜，除試過於張國榮4月1日死忌，與林欣彤以busking方式悼念、又試過拉唐詩詠一直唱《陪着你走》，每次都有不俗的收視，問到阿博可有吸晴秘訣，他表示：「其實我不是太在意有無多人睇，而是直播時能不能夠serve到一些真的需要我的人，例如凌晨兩三點大家瞓唔着，我可以陪到大家。」