《賭城群英會》拍續集 叻哥一人分飾2角收視必火

撰文:黃梓恒
出版:更新:
《賭城群英會》平均得20點收視。(網上圖片)

《賭城群英會》在一片噓聲中出現,播了接近一個月的時間,收視平均保持在20點,證明依然有人一路鬧一路看,起碼它比起《蘭花刼》的18點收視要高。近來傳出《賭城群英會》將會開拍第二集的消息,的確令人震驚。要知道若果一套劇集收得,開拍第二輯是可以預測的事,但《賭》不但唔收得,而且惡評如潮,為什麼還有勇氣開拍下去?

仲開續集?唔係啩?(網上圖片)

你有你鬧,佢有佢拍,據知第二輯叻哥依然揹重飛,劇情入面仲自己一個人分飾兩角做埋孖生細佬同自己鬥戲,美劇Orphan Black(《黑色孤兒》)Tatiana Maslany一個人分飾十幾個角色已經好極限,不過叻哥的功力分飾一百個都絕對不會有問題。睇過《賭》就知道叻哥在戲中的確高水準發揮,只看他那一場欲哭無淚的戲已經令人拍爛手掌。可能王晶聽得到觀眾們心裏的掌聲,所以即刻搵返叻哥再續前緣,趁他還未因此劇而拿視帝,早早簽約免得水漲船高,到時就到晶哥欲哭無淚了。

叻哥呢場戲真係永在心。(網上圖片)

根據有份拍《賭》的文凱玲透露,晶哥新劇叫做《大千世界》,聽個名已經感覺到氣勢有幾咁磅礡,有個「千」字難道又是講老千?即是又講賭?劇組的題材寫的是時裝和勵志劇,8月初便會在深圳開機,聽聞都搵咗好多TVB的演員去拍攝。《香港01》打電話問過麥明詩同高海寧,她們都說沒有收到消息《賭》會開續集。男主角馬國明亦表示未聽過《賭2》,咁如果有想唔想拍呀?他說:「最緊要有工開,不過希望開過一個新故事,因賭城結局會死好多人,希望成班賭城嘅演員可以一齊開多套,呢套拍得好開心。」至於問到新劇《大千世界》有無佢份,佢就笑笑口講:「唔知呀...」其實他們3個都表示沒聽說過《賭城群英會》會開第二集,不過改名,換湯不換藥也是常識吧。

馬明態度有啲曖昧。(網上圖片)