【超時空男臣】周麗欣年拍8劇 迫演恐龍超想喊:感覺好侮辱

撰文:
最後更新日期:

甚麼人七個月時間可以有八套劇上電視?《超時空男臣》中,王君馨飾演的汪以珊(即是太子妃)有一個傻乎乎的助手叫Ceci。觀眾們有留意的話,2017年無綫黃金檔期已經播放了的13套自家劇集,她足足出現了8套,這個紀錄的確是沒有對手,包括:《味想天開》、《乘勝狙擊》、《與諜同謀》、《我瞞結婚了》、《全職沒女》、《心理追兇》、《不懂撒嬌的女人》和《超時空男臣》,就連《愛·回家之開心速遞》都有她的影子。雖然當中有一半都是跑龍套角色,不過真是十分勤力。可惜未必所有人都記得她的名字,早在2007年便出道,當年在遊戲節目《味分高下》中以「味之天使」士多啤梨的身份跟大家見面,其實她叫周麗欣(Doris)。

這個「跟得」助手傻傻哋咁,惹人好感。(網上圖片)

因此劇與君馨成為了好朋友。(周麗欣Instagram)

入行九年,頭三年在無綫拍劇基本上都是跑龍套,直到近年才開始多點機會做女配角,不過依然未有特別令人深刻的角色。做主角?看來還是很遙遠,不過並不代表Doris失去了望想,在接受《香港01》訪問時她說:「同你講無諗過係呃人!入行9年期間,講真一定有諗過自己可以做主角,只係欠運氣欠機會!入行初期有埋怨過公司點解唔俾我更有發揮嘅角色同點解唔俾機會我。因為咁2010年覺得喺公司無機會,曾經離開TVB,簽約出面經理人公司,組成五人女子跳舞組合Lacee Lacey,希望搏取一個成名機會,成名後可以爭取到更好更有發揮的角色,甚至女主角。」然而組合尚未出碟便遭解散,同為組合成員的林泳淘和阮兒也繼續在無綫等機會,Doris續說:「但跌碰多年,令我明白到自己嘅不足。聲、色、藝,樣樣都剛剛好合格,可以應付工作,但無一項技能特別出色。所以而家努力吸收中,希望可以好似吸水海綿咁,吸多啲學多啲,吸到滴水,磨練好自己把刀先。雖然在電視劇未做到女主角,但我都做過兒童舞台劇《小白雪勇闖動漫城》女主角同微電影《港女聖經3條》女主角,好感恩。自己真係好鍾意演戲,希望可以成為獨當一面、有創造力嘅女演員,目標張曼玉。現在正向住這個目標努力奮鬥。」古語有云十年磨一劍,下一年便拍劇拍足十年,未知又會否迎來新機會呢?

Lacee Lacey這隊組合很快解散了。(網上圖片)

在《超時空男臣》中,雖然都只是女配角,但由於她跟女主角王君馨經常在一起,所以戲份比起以前的劇更多,她說:「其實公司一直給我好多工作機會,多謝監製Marco選我演出《超時空男臣》,令我學到好多好多,因為戲中飾演王君馨的助手,出鏡率好高,可以長期跟住劇組學習。因為咁好開心和君馨成為了好朋友,她和我分享了好多。今次拍攝最難忘的,是可以跟劇組返佛山拍攝,當中有好多動作場面,特別係蕭正楠劫走王君馨果場戲,好多鏡頭都係一take過完成,好專業。令我明白自己要加倍努力。」

《超時空男臣》是她比較多戲份的劇。(周麗欣Instagram)

好在唔係成日都咁低人工。(周麗欣Instagram)

無綫人工一直都不太高,尤其對一些配角演員,Doris就表示曾經試過一個月只有$2,500人工,她表示:「入行咁多年,爆show時平均每月人工維持係15,000左右,有時未出爆show錢,試過最低出$2,500人工一個月,勉強維持到生活,但自己份人工買唔倒樓。有時總要屋企人支持,好彩唔使交租同雜費,亦都唔使我俾家用,加埋自己啲積蓄都勉強可以。好彩我自己本身唔鍾意出街,人工低嘅時候唯有出少啲街留喺屋企,咁就捱到過去。不過都好彩我多數都爆show,都唔會成日出現呢個情況。」屋企人對她的支持顯得十分重要,但Doris入行這麼多年但人工仍未穩定,屋企人又會否支持她繼續向前行呢?「屋企人好支持我做自己鍾意的事,但他們會擔心,因為唔紅,收入就不多不穩定,手停口停,所以上年家姐有建議我轉行,起碼搵有穩定收入嘅工作,唔好好似而家啲工作咁唔穩定。最終因為家姐錫我,暫時我可以繼續做自己鍾意嘅事,但要求我開始要想清楚,為將來打算。」她為自己想做的事而繼續選擇撐下去,但是否一直都要這樣下去呢?轉捩點會否在即將到來的時間出現?無人知道答案,相信Doris也不清楚自己未來的路。

除咗劇,綜藝節目《冒險少女》都有佢份。(周麗欣Instagram)

跌碰這樣多年,一直也想浮上岸,但出面風浪太大,每年上岸的人很多,但未必是你,會否想過放棄?離開這個大海洋?其實放棄這個念頭也曾經在她腦海中閃過,她說:「無工開、被鬧不知所謂、失意時有諗住放棄,點解不被尊重!點解無尊嚴!想走又唔甘心,所以繼續行,因為行行都係咁,人人都會經歷,大家只求一個機會。有一次試過去拍電影,本來飾演美女角色,但到達現場後,因人手不夠,要我着上黑色衫褲,畫黑塊面,走入公仔扮恐龍,原因係我夠高!嗰刻超想喊,感覺好侮辱,認為唔係演員嘅工作,原來自己可有可無,第一次有想放棄唔做嘅想法。但接咗工作就要完成佢,最終唯有頂硬上,捱過咗,依家回想都無咩嘢喇。」努力撐下去吧,相信一定會等到你的出頭天!

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。