【放學ICU】蓋世寶譚玉瑛18年姐妹 離開兒童組狂喊:太多回憶

撰文:
最後更新日期:

蓋世寶一入兒童組就和譚玉瑛姐姐合作,共事18年,蓋世寶更以親人來形容譚玉瑛。

《超時空男臣》令大家再留意到,小時候日日放學都見到的蓋世寶,在兒童節目18年,她和譚玉瑛是不少人的集體回憶,但不知何時,開始傳出二人不和,在Google打上二人名字,第一個彈出的搜尋結果是「究竟蓋世寶同譚玉瑛有咩恩怨?」內容是指蓋世寶在最後一集《放學ICU》錄影,好像說話頂撞了譚玉瑛,傳聞似層層,不過一直沒人求證。到2015年《放學ICU》結束,二人亦離開工作了18年的崗位,蓋世寶接受《香港01》訪問,問到她和譚玉瑛姐姐其實有沒有不和,她表示絕對沒有,亦覺得傳聞好好笑,她更以朋友、親人、前輩來形容譚玉瑛。

《放學ICU》最後一天錄影,除了譚玉瑛外,全部換了黑色tee,(左起)鄧永健、司徒瑞祈、蓋世寶、譚玉瑛、蕭徽勇、吳綺珊、陳沛霖,蓋世寶表示當日是2014年12月22日,冬至,收工後大家一齊唱K。(圖片:蓋世寶提供)

她說:「同佢共事十幾年,片段同回憶也是太多了⋯⋯工作、心事、感情也會分享。佢因為大過我哋,所以好多時都會用人生或生活經驗教導我哋,當然佢亦好玩得,佢其實講野係幾好笑㗎。」譚玉瑛姐姐原來攪笑?真的完全想像不到,而對兩位來說離別當然最深刻的,她說:「最深刻嘅,當然係收到佢要先離開兒童節目的一日,當日我等了一個我同佢都break嘅時間,我叫佢同我傾下計,我叫佢唔好理我咩情緒,我係好易喊,佢當然慣咗我係咁啦,我問佢到底咩一回事,佢一路講我一路一喊,繼續問繼續傾...」

譚玉瑛、沈卓盈、蓋世寶、王少萍、陳佩思,五位做完兒童節目後,成為好朋友,經常相約一齊食飯。(圖片:蓋世寶提供)

提起譚玉瑛這件事,蓋世寶特別感觸,她說:「記得出事之前那幾個星期,佢講過話留番長少少d頭髮,但佢突然又剪短、又少左鬧我哋,所謂鬧我哋,我哋係唔會驚嗰隻、而家諗返佢係有啲唔同.....而我,同佢共事咁耐、識左咁耐,係好應該要發現到,我覺得係我對佢疏忽咗...令她獨自面對...呢個突如其來的心情.....」

用WhatsApp訪問蓋世寶,叫她講一下跟譚玉瑛的關係,結果不計emoji她總共寫了656字,足見譚玉瑛在蓋世寶心目中的地位,蓋世寶很記得和她的一點一滴,她說:「有一曰要返公司傾之後去向,我當曰決定陪著佢,所以在公司等佢,接佢離開,之後我哋去左茶餐廳飲杯野、車佢去大學攞野、再帶她去了穿耳環,因為佢之前終於覺得想穿番個耳窿,而我哋勸咗佢好多年,佢當時話遲d先,我叫佢攞團火出想做就做啦⋯⋯終於,佢穿咗耳窿。」

蓋世寶和一眾節目主持關係要好,而蕭徽勇在最後一集《放學ICU》為大家帶來驚喜。

譚玉瑛在2014年4月18日離開《放學ICU》,之後去了《東張西望》,剩下來的蓋世寶變了大家姐,不過節目亦在半年後完結,變了現在的《Think Big天地》,她說:「佢走咗之後大約半年,我哋未解散,我哋覺得冇咗佢嘅帶領,我哋仲要做得更好!但大家其實係唔開心.....之後幕後炒剩一個,心情就更難捱,終於,去到《放學ICU》嘅last day ....我哋食晏開咗個簡單的party,竟然,在蕭徽勇哥哥的安排下,譚玉瑛突然出現,我喊到爆炸,我知佢明明係開緊工㗎、但我好想佢出現,就係咁……我哋嘅last day就變得好完滿⋯⋯呢個surprise好多謝蕭徽勇。」

蓋世寶的名字,連Ben sir節目亦有惡搞,她亦不介意。

至於在譚玉瑛最後一集《放學ICU》蓋世寶對她說了什麼?為何網民這麼大反應?片段已在YouTube刪除,但蓋世寶仍然記得,她說:「嗰日監製叫譚玉瑛姐姐,對我哋每人講啲類似勉勵說話,袋錢落你袋嗰啲,我好似叫佢唔好講咁樣,其實熟先會大家窒對方嘅啫,因為大家真係好close。」除了譚玉瑛,提起蓋世寶一定會想起那句粗口,她亦一早知道,她說:「其實冇咩感覺㗎、好耐之前已經有同事咁玩過我,我都覺得好順口,我都好支持押韻㗎。」

+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。