【是咁的,法官閣下】王君馨終做女主角 最緊要貼地:唔好老土

撰文:
最後更新日期:

Grace新婚不久就有得做女一喇!(Grace Instagram)

最近落實拍攝的新劇《是咁的,法官閣下》,除了劇名新穎搞笑之外,另一個賣點就是剛剛結婚的王君馨(Grace)終於第一次做女一!近排Grace演技大受好評,繼《心理追兇》之後又有《超時空男臣》,現在準備又開新劇,加埋宣傳,都無時間陪老公,會否被「詐形」?在接受《香港01》訪問時她說:「雖然我哋而家見少咗,但點都多過以前一年見兩次,所以見幾少都好,同以前比都係一個好大嘅進步。大家都唔會詐形,因為都知道對方好忙。(一結婚就做女一喎?)我哋好似互相旺緊對方,都覺得呢啲係神嘅恩典。」從言語中已經感受到他們那一種互相體諒的愛,難怪Grace十分安心繼續在工作上拼搏。

《是咁的,法官閣下》九月就會開機拍攝喇!(網上圖片)

今次新劇劇名大玩潮語,Grace又知否來源是甚麼呢?她說:「個名點樣得嚟呢…我就唔知,我要問吓監制先。(第一次女一有無壓力?)今次第一次做女一緊係非常之開心喇,同埋都十分期待第一次同智賢合作,仲有關禮傑。其實我已經識咗傑哥好耐,因為《舞動奇蹟》,嗰陣係我啱啱入行嘅第一個大型綜藝節目,傑哥好照顧我。同呢兩位男演員一齊合作,我覺得我會袋到好多嘢入袋,所以都唔會話好大壓力。我今次個角色係一個女主播,係一個內地女仔,亦去過外地讀書,比較獨立,成個世界都圍繞住自己。又唔係一個好貪慕虛榮、拜金嘅女仔,但係非常獨立同聰明。劇中同黃智賢(Ben)、關禮傑有一個三角關係,我係做阿Ben老婆,但成日都會同傑哥走埋一齊,係一個幾搞笑嘅三角關係。」首次做女一就跟兩大演技派大鬥法,的確值得令人期待!

在《心理追兇》中,Grace演技大受好評。(Grace Instagram)

其實陳耀全做監制的劇口碑真的口壞參半,有人說他夠貼地,但又有人說不夠大眾,未符合TVB受眾的口味。Grace表示:「唔係剩係話TVB嘅觀眾,而家香港觀眾除咗會睇啲抽象少少,例如《超時空男臣》呢啲之外,都鍾意睇啲劇集比較貼地,好似《親親我好媽》收視都好好,呢啲劇會比較接近香港人嘅生活。我覺得我哋公司有大製作,有啲小品無咁離地,觀眾睇落去就會覺得同角色關係好接近,就會有共鳴。我唔會擔心收視,反而真係希望做到貼地得嚟又有正所訊息,但又唔係做到好老土嗰種精精神神呀,身體健康呀,日日都好樂觀咁就得,唔係要呢種。係要一種好真實嘅生活方式,每一個角色面對嘅嘢,最後用一種正面態度去處理自己嘅人生,呢套劇嘅角色正正就係咁。我覺得都幾得意架,因為我都好少拍呢類型嘅劇集。」的確劇集如果夠貼地是會更吸引觀眾,起碼不要像某些劇集不斷製造誤會又不斷化解那麼無聊。

貼地真係好重要架。(Grace Instagram)

Grace還有對劇集有些補充,其實(是咁的)是年青人喜歡用的詞語,剛好乎合在法庭上律師們向法官闡述的開塲白,亦可以容易讓觀眾明白這部是以輕鬆寫實為题,活潑又充滿港味的勵志律政劇! 今次這部劇與以前律師劇不同的是,法庭在劇中是一個非要主要的場景,法官與律師們的關係是過去的其他劇裡較為少見描寫。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。