MCJin徒弟KT惡搞《中國有嘻哈》 Rap到流鼻血好經典：師傅都話勁
最近一見到朋友必定會講一句「你有free style嗎？」，呢句話出自內地真人騷節目《中國有嘻哈》其中一個評判吳亦凡口中，最重要係帶挈了節目中化身做Ｈip Hop man的MC Jin成功殺入內地市場，但原來MC Jin有位徒弟現時都係TVB打滾，佢就係唐嘉麟(KT)。KT最近就與一班TVB好友胡鴻鈞及張明偉等人組成「CHILL MEN休閒俠」一齊抽水拍短片做《一廠有嘻哈》，KT就話，「其實係想抽下師傅水，俾大家開心下。」
KT同MC Jin嘅關係既是好友又是師徒，2010年Mc Jin開經理人公司仲簽埋佢做旗下歌手，「其實佢對我嚟講已經唔係師傅咁簡單，佢係我屋企人。」KT透露當年原本要推出專輯，但因MC Jin要開始計畫反美國結婚生仔，所以將專輯計畫擱置，但佢從來無埋怨過對方，「反而我係支持佢，返美國生活都好正常，係呢行係你嘅就係你，都睇得好淡，但嗰下做音樂嘅火就熄咗，於是去TVB拍下劇。」而現時已進入TVB第四年嘅佢，都係因為當年阿Jin做《兄弟幫》主持的緣故，「佢嗰陣做《兄弟幫》，監製叫佢帶一班好兄弟上嚟，我係其中之一。」他笑言TVB監製當時見到佢外型係TVB係好少，「我又有紋身，又唔系靚仔小生樣，覺得我好標奇立異，佢地就話不如簽我地喇 ！」
但他當時未有即刻簽約，因為同Mc Jin的經理人公司還有合約，直到2014年完約先簽TVB。KT笑言當時入TVB有咩角色都做，「當時諗返其實我由細到大都好有表演慾，入到公司咩都做，就算過鏡嘅都無所謂。」TVB出名揾錢揾得唔多，雖然未有透露現時的薪金，但幸好他都有做生意，「我本身好鍾意車，所以就代理汽車零件生意，咁香港物價越來越貴，都要做下其他嘢幫補下。」
提到MC Jin近日因《中國有嘻哈》人氣再度爆紅，KT就話一直都有聯絡而前幾日先同對方聚舊，「咁啱佢係香港轉機，所以就有d時間食飯。我見到佢都有抽下水問佢你有free style嗎？」之後問到有無趁機叫對方推薦自己上節目？KT直言，「講真嗰心係想嘅，但無講出口。始終現在我係TVB嘅藝員，但我好想靠自己。」其後續道，「佢都有同我講，其實我好佩服你，你又無左我都ok。我係電視機經常見到你，你都好嘢。」
講到KT不得不提2011年佢係《歡樂滿東華》中一路rap一路流鼻血，成為當時熱門話題，今日重提事件KT表示因為鼻膜較薄加上正值冬天，所以就發生流鼻血事件並笑言當時老闆MC Jin都有即刻打電話關心，「佢係電視睇完打電話問我有無事，我話無事之後，就話笑到好緊要。但最後話我好勁，一路流鼻血都可以唱完首歌。」