【任噏亂評.森美早霸王】男女感情唔再係電台年代

撰文:
最後更新日期:

森美同小儀主持嘅電台節目《早霸王》最近連續兩單示愛環節出現意想不到嘅狀況,經驗老到嘅森美同小儀都dead air畀唔切反應,確係老貓燒鬚!

森美同小儀嘅《早霸王》接連收到非一般示愛電話,令他們不知所措。

呢兩個case一單係男聽眾「管家婆」打去想同阿希示愛,森美同小儀就喺節目度打畀阿希啦,但估唔到接電話嘅係男仔聲,森美已經dear air,再問之下對方確係男仔而且係鍾意女仔;另一單係女聽眾Lucy打去《早霸王》同一個相識8年男仔Bosco示愛,稱彼此相愛而且對方曾經表白但被她拒絕,現在藉節目表白,但當森美、小儀打畀Bosco,原來Bosco已經結婚仲有個仔,森美、小儀完全dead air畀唔到反應。

森美自己也是有老婆有兒子的人,應付聽眾的感情問題應該手到拿來吧。

其實呢個環節有啲似廿幾年前電台嘅乜乜夫人信箱,聽眾寫信畀DJ問愛情問題或者向心愛嘅人表白,DJ讀完封信通常講幾句:「阿邊個邊個如果你都愛邊個邊個,就行動證明啦!」諸如此類,簡簡單單,連被愛者有冇聽到都唔知。

但係時代變,phone in也必然甚至可以算係落後,森美同小儀呢個示愛環節,要喺短短十幾分鐘內了解聽眾嘅身份同經歷已經難,莫講話係唔係小三、小四,抑或離過婚結咗婚,就算簡單如性取向都未必知道嘅情況下,的確唔可以掉以輕心。

感情關係向來複雜,同性戀者也可以豁出去在眾目睽睽下示愛,有妻兒子女也會與單身女子搞瞹眛嘅時候,如果仍然以為愛情係單純只有一男一女嘅關係的話,森美、小儀未免太天真!

不過話說回來,你估兩個主持真係咁單純咩!可能dead air只係為咗節目效果啫,喺呢個年代做電台節目好難突圍而出㗎!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。