【賭城群英會】強姦戲照抄《賭聖3》 吳家樂：條橋我哋冇權理
撰文：何志衡
出版：更新：
TVB劇《賭城群英會》嚟到結局篇，有睇開嘅都想知有乜驚天地泣鬼神嘅橋段，但係昨晚嗰集吳家樂為咗測試馬國明係咪扮盲，於是喺佢面前強姦佘詩曼嗰場戲，竟然係照抄2000年嘅《賭聖3之無名小子》。吳家樂回應《香港01》時就好尷尬咁講：「劇本幾時輪到我哋啲小演員參與吖！我哋冇權批評任何劇本嘅嘢！」
馬國明扮盲睇住愛人被仇家強姦，同張家輝喺《賭聖3》嘅演出一模一樣。
《賭城群英會》（上）佘詩曼封住嘴被強姦，同《賭聖3》舒淇被姦一幕有9成似。
王晶話晒曾經係橋王吖！當年佢監製兼導演嘅《賭聖3》，張家輝為咗留絕招喺賭局使出於是扮盲，奸角黎駿為咗試下佢真盲定假盲，就潛入張家輝屋企喺佢面前強姦舒淇，張家輝一路睇（聽）住電視播《獎門人》一路笑嚟掩飾，睇到觀眾心都噏晒！
連摸住牆行入大廳一幕都幾乎一樣。
但係今時今日呢場戲竟然照辦煮碗重拍一次！昨晚同樣係王晶監製嘅《賭城群英會》出現幾乎完全相同嘅劇情，馬國明扮盲，奸角吳家樂又係潛入佢屋企，為試佢係咪真盲喺佢面前強姦佘詩曼，電視又係播緊《獎門人》，馬國明又係以笑嚟掩飾，隔咗17年王晶係想我哋觀眾懷舊，定真係冇晒橋呀？
兩場戲同樣電視播放緊《獎門人》，創意呢？
《香港01》致電喺劇入面強姦佘詩曼嘅吳家樂，佢聽見兩段劇情咁相似都有啲愕然，但表示唔記得有冇睇過《賭聖3》：「張家輝嗰套唔記得有冇睇過喇，真係咁似？」吳家樂話拍攝時王晶唔在場，整套劇有4個導演：「我哋都係睇劇本，導演決定點拍㗎啫！至於條橋係點我哋冇權理，劇本幾時輪到我哋啲小演員參與吖！我哋冇權批評任何劇本嘅嘢，如果講條橋就一定係正啦！」佢補充呢場戲係拍晒澳門場景之後，隔咗1個月至喺香港拍攝，但係場戲咁似王晶自己嘅舊作，吳家樂就話：「我都想睇番《賭聖3》睇下係咪咁似，但或者係王晶想recall番大家嘅記憶呢！好似何浩文有場戲做鴨，都似《鴨王》、四哥（謝賢）造型都似佢舊作㗎，我懷疑係晶哥專登攞番出嚟！」原來王晶咁想我哋懷舊，咁我都係攞番啲舊戲出嚟睇算喇！
《賭城群英會》吳家樂用手指指住馬國明，《賭聖3》就係用槍指住張家輝。
吳家樂就話演呢場戲只係照劇本做，並唔知道咁似《賭聖3》。
吳家樂指謝賢嘅造型都熟口熟面，係集體回憶。