【玩死蜘蛛俠】湯賀蘭頂唔順Stan Lee電話騷擾 辭演Spider-Man？
撰文：何志衡
出版：更新：
《蜘蛛俠：強勢回歸》全球票房大收，飾演蜘蛛俠嘅湯賀蘭（Tom Holland）亦紅到發紫，觀眾都大愛呢位21歲嘅新蜘蛛俠，雖則最近傳出佢狂追梅嬸Marisa Tomei但亦無阻粉絲期待佢下一次演出。
觀眾已普遍認為湯賀蘭演嘅蜘蛛俠係目前最好，如果又換人會好困擾。
不過日前有外地網媒發布消息，指湯賀蘭被Marvel之父Stan Lee電話滋擾，而且談話內容古怪難頂，故決定唔再演蜘蛛俠咁話。喂喂！真定假㗎？唔通Spider-Man又要換人？唔好咁認真住！
Stan Lee想像力豐富至創造到咁多英雄人物，但未至於語無輪次卦。
報道嘅內容都幾古怪，指Stan Lee不斷聯絡湯賀蘭，內容全是圍繞Uncle Ben，即係養大蜘蛛俠後來死咗嗰位Uncle Ben呢，Stan Lee話Uncle Ben死嗰陣，蜘蛛俠走近佢，應該要有條水柱由頸注入Uncle Ben個口，Uncle Ben感覺到味道好似有幾千隻動物浸死咗喺裡面咁。Stan Lee好似醉酒佬講嘢一樣非常騎呢！
報道又話湯賀蘭因為頂唔順Stan Lee所以決定唔再接演蜘蛛俠電影，仲指Stan Lee喺facebook回應要送湯賀蘭一程。
報道更「轉載」Stan Lee的社交網頁，聲稱佢同湯賀蘭say goodbye，但我哋查過呢段貼文可能係假。
有網友睇完好擔心蜘蛛俠又要換人，不過湯賀蘭嘅Twitter同ig都冇對事件作出回應，佢只係如常咁出席宣傳活動，而喺Stan Lee嘅facebook page亦唔見報道所轉載嘅Stan Lee回應，加上內容古怪難明，相信呢單新聞只係惡作劇啫！
湯賀蘭會喺《復仇者聯盟3》繼續演蜘蛛俠。