【BigBoys歷險記】龍哥被消失？　朱智賢：佢份人比較搞笑幽默

《BigBoys歷險記》間接令龍哥人氣爆升，其中龍哥的「作法」也令廣大觀眾嘆為觀止。先唔好理龍哥「作法」的真偽(或者根本上證實唔到)。原本「擔定櫈仔」等著看龍哥「作法」的網友可能會失望，因為有消息說《BigBoys歷險記》將會由四集變成兩集(今晚8月6日為最後一集)，而今晚的節目內容中，龍哥所有戲份也會被剪走，即是「乾坤一開，三七氣流一轉」這些對白都會剪走晒。

節目中的主持之一，朱智賢接受《香港01》訪問時說：「大家第一次接觸龍哥，睇完第一集，睇埋上集尾嘅預告，好似好精彩咁。所以大家都好期待，但係宜家嗰部份冇咗嘅話，就好可惜。但係唔知遲啲有冇網上版本可以睇返呢？」雖然消息傳得似層層，不過想知是否腰斬節目和龍哥仲有冇得留低的話，其實留待今晚就會知道。

雖然很多網民對龍哥的印象不外乎是「神棍」之類的形象。但是朱智賢(Ashley)對龍哥的印象也不錯：「我覺得龍哥份人其實係比較搞笑幽默，因為當每次我哋好驚嘅時候，龍哥佢都會話：『有龍哥喺度，大家唔使驚！』咁樣安慰我哋，其實佢都幾識搞氣氛㗎。但係你話網上嘅人評論佢施法嘅嘢我就俾唔到意見，可能信嘅人就信，唔信嘅人就覺得幾有娛樂性咁囉。」

雖然未知今集的內容如何（或者仲有冇第三集都未知）。不過朱智賢也在訪問中透露了一點內容。她說：「我唔係好記得元朗間荒廢學校叫咩名。因為大家都係坐車去，其實嗰度都幾隱閉，因為係已經棄置咗。咁去到我哋就去睇下啲課室，睇下環境之類。然之後行到一半，龍哥又係話，feel到嗰度有靈魂係嗰度。之後就要作法咁樣。」(呢次又係要上身？)「冇上身，但係我聽到就係佢哋係度『打』。龍哥講就話『同佢哋打過』。我唔知點形容，龍哥類似耍功夫咁。『打』緊嘅時候好似係合埋眼嘅。最後龍哥仲講咗句：『頭先叫你投降又唔投降，宜家打輸咗先嚟投降？梗係冇咁著數啦』咁樣。」

呢集淨係聽朱智賢講都覺得好好睇，又「打」鬼又「作法」咁。如果冇晒龍哥嘅片段，我諗成個節目即刻冇晒觀看焦點吖。