《關公大戰外星人》導演玩穿越 未來版陳浩南打到入內地

撰文:
最後更新日期:

《古惑仔》你一定睇過,《關公大戰外星人》你冇睇過都一定聽過(YouTube有得睇),如果撈埋會變成點?陳浩南揸住《星戰》光劍你又見過未?

《香港大師》可以話係科幻版《古惑仔》。

片中出現光劍、懷舊武器,導演解釋:「我好鍾意將自己鍾意嘅嘢嚟惡搞,撈埋一碟炒畀大家食,除咗光劍,仲有啲亞基拉、高達等元素喺入面。」

《關公大戰外星人》導演梁仲文最近有新作叫《香港大師》,恐懼鳥編劇,同《關》一樣係科幻片,講未來世界出現了一班叫鐵頭人的改造人部隊維持社會秩序,但鐵頭人手法過火濫殺無辜,甚至凌駕警察,一班過氣古惑仔為守護同伴,連同一個叫「香港大師」的神秘人物共同對抗敵人,而一班主角造型都幾似鄭伊健版本嘅《古惑仔》。《香港大師》今日發放咗新預告片,男主角Matthew Manson長髮造型確係令人想起鄭伊健,「衝三小」人物設定都係以山雞、包皮為藍本,另外睇開cult片都會認得嘅Sam哥,女角就有譚淇淇同埋YouTuber曾樂彤。

梁導演形容《香港大師》屬於科幻復古類電影,有未來機械,但又有復古嘅味道。

導演梁仲文接受電話訪問時表示係有意模彷陳浩南:「同投資方傾過,《古惑仔》喺內地好多人鍾意,套戲又係講古惑仔,咁不如試下用番嗰啲形象去玩套科幻電影啦!當係致敬作品。」不過《香港大師》由內地投資,暫時只會9月開始喺內地國內收費頻道播放,香港睇唔睇到就未知,而黑社會題材嘅電影從來絕迹內地,《香港大師》又點過到關呢?「呢個答案好有趣,因為故事設定喺未來嘅一個架空世界,盡量將現實世界縮到好細,古惑仔呢個稱呼就好似古代武士、忍者咁被神化咗,唔係真正嘅黑社會,仲講黑社會好老土!」梁導演補充:「本來個設定就係咁,可以話係錯有錯着咁避開咗內地呢個審查問題。」

為減低成本,不能用大卡士演員及只得象徵式片酬,圖中為譚淇淇。

6年前嘅《關公大戰外星人》有很多反建制元素,但新作主打內地市場仲可以有所譏諷嗎?梁導演就自我反省:「我覺得《關》要講嘅嘢太淺薄,乜都直接講晒出嚟,對我嚟講可以話幾懶;呢幾年我進步咗唔想咁多抽水嘢,民生、現代社會發生嘅事都有講,但既然要打入內地當然唔可以講到咁出啦!但我唔係驚封殺。」

4年前嘅《關公大戰外星人》以極低成本拍攝,片長只得十幾分鐘但成功引起話題,今次《香港大師》則有60分鐘長度。

梁導演再次拍cult片依然低成本,佢表示花咗接近7位數,大部份花喺特技上面:「呢個成本喺戲院放有啲勉強,作為網絡電影就幾吸引。」

片名叫《香港大師》但可能不會在港上映確有點奇怪。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。