【同盟】亞視忠臣兼影后 鮑姐曾為亞視被拖糧員工落淚

撰文:溫菁莉
出版:更新:

鮑起靜(鮑姐)於TVB的首部劇集《同盟》今晚就首播,唔知大家仲記唔記得其實鮑姐係亞視之寶,佢同亞視之間嘅關係就同等號一樣。《同盟》中主要圍繞住孝義,昨日陳展鵬出席宣傳活動時就大讚鮑姐真人都好有義氣,原來亞視面臨倒閉期間,已經與對方無合約嘅鮑姐仍然覺得自己都依然是亞視藝員,所以到亞視真正熄機先肯過檔同TVB拍劇。鮑姐就話,「係真㗎,好多人都話我係亞視代表,其實我都唔係亞視好主要嘅演員,當時我覺得亞視真係完結咗,先有心思諗其他嘢,如果唔係真係比較難成事。」據知,無綫同鮑姐傾合作傾足三十多年,真係好誇張!

今次鮑姐在《同盟》入面有好多動作戲。
鮑姐係亞視30幾年,已經成為icon。(視覺中國)

鮑姐係亞視30幾年,代表作真係好有好多例如《再見艷陽天》,《肥貓正傳》及《包青天》等。近年鮑姐比較將工作重心轉移到電影,就好似《殭屍》 同《大手牽小手》都令觀眾留下深刻印象,2009年,鮑姐就憑電影《天水圍的日與夜》首次獲得香港電影金像獎最佳女主角獎。2015年,鮑姐雖然已經貴為金像獎影后,但仍然對亞視嘅情一直都係度。當時亞視投資者王征接受內地訪問時表示不肯賤賣亞視令它有一線生機。身為「亞視之寶」的鮑姐更公開揶對方是敗國者,並十分同情當時被拖糧的亞視同事,仲哭訴鬧爆王征行為騎呢,好可惜亞視依然逃不過厄運在去年4月1日正式熄機。

今次鮑姐係《同盟》入面同陳山聰做母子。

提到亞視與TVB拍劇有咩唔同,鮑姐就表示TVB有規律,「一日排幾多場就要拍完,唔可以甩嘅。以前亞視就好多甩甩漏漏,有好多阻滯。而家就好多好急。」咁多甩漏,係亞視拍劇應該好輕鬆?鮑姐笑言唔一定輕鬆,「因為亞視有亞視嘅緊張,好多時候套劇出街我地都仲拍緊,呢度就無咁嘅情況。好似以前拍《包青天》咁,一路拍一路趕。」

唔洗講休息時間對於演員來說都好重要,鮑姐就話好感激TVB都好體諒,「完全係夠時間休息,咁時間拍得長就一定嘅。當今次TVB真係對我好好,反而以前亞視休息時間以前真係無乜,雖然當時我仲年輕,所以今次都OK。」今次鮑姐係《同盟》入面又要揸槍又要跑來跑去,她透露有場就不小心拉傷條筋,「因為嗰場展鵬就要捉住我跑得好快,完全跟唔上,但好快就無事。」鮑姐笑言嗰次拉傷條筋之後每場戲都好小心。