【Big Big Channel】鄧萃雯黎耀祥直播互窒爆笑 隨時有機演父女

撰文:
最後更新日期:

鄧萃雯與黎耀祥這對最佳拍檔昨晚齊為「Big Big Channel」做直播,經典組合再現,唔少網民都十分雀躍。直播一開始,大家問得最多嘅都係「雯女幾時再拍劇」,她表示正在等陳寶華(陳的作品有《再見亦是老婆》、《十月初五的月光》、《真情》、《妙手仁心Ⅱ》等,早年轉戰內地至近年回巢TVB。)的完整劇本才再考慮,在旁的祥仔聽罷馬上笑雯女咁揀擇,「咁你點生活呀?」沒想到雯女轉數十分快,並謂「慳啲使,唔買法拉利」,似乎在笑祥仔愛兒早前晒靚買車貴表一事。

鄧萃雯與黎耀祥為「Big Big Channel」一齊做直播,不時窒來窒去,甚有火花。(影片截圖)

二人搞笑對答一輪後,雯女轉入認真mode,解釋開頭一番說話,指有完整劇本的話,可讓一眾演員圍讀,令效果出來更好,不過祥仔就認為拍劇講靈感,預先傾好會少了驚喜,聽落又似乎幾有道理咁,果然係視帝。

祥仔話自己拍完《巾幗梟雄之義海豪情》後,幾年都唔敢再睇返,因為覺得劇情好似真係發生過咁。而如果要在《巾幗梟雄》與《巾幗梟雄之義海豪情》之中揀,他會選擇後者。

期後當網民聽到雯女表示十分歡迎同祥仔再次合作時,即問二人想做夫妻、兄妹、父女還是仇人,雯女聽到「父女」二字時忍不住大笑,並向著皺晒眉頭的祥仔謂:「睇佢囉,如果佢都係咁殘,就要做父女喇。或者忘年戀,冇辦法,因為依家要講顏值。」說畢又不忘「補飛」謂:「佢其實有時可以好有顏值,例如同我一齊做活動,佢係特別靚仔啲架。」

祥仔即接話笑指自己是「睇場合嘅人」。之後,網民再提議二人開演唱會,雯女聞言即拉祥仔落水:「你跳舞呀,我唱歌。」祥仔亦不甘示弱反擊:「你夠膽唱,我夠膽跳。」雯女聞言再次大笑,並追問祥仔:「我無論唱咩,你都跳到係咪?」祥仔即示:「我即刻為你排隻舞都得。」如果二人真的兌現承諾,相信欣賞指數一定爆燈,希望有直播啦。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。